Dy burra u varën në Iran të mërkurën, njëri për lidhje të dyshuara me agjencinë e spiunazhit të Izraelit dhe tjetri për vrasjen e dyshuar të një oficeri policie gjatë protestave antiqeveritare në janar, thanë autoritetet dhe grupet e të drejtave të njeriut.

Dy ekzekutimet janë të fundit në një varg ekzekutimesh në Republikën Islamike që nga shpërthimi i luftës në Lindjen e Mesme me sulmin SHBA-Izrael ndaj Iranit më 28 shkurt. Arrestimet dhe varjet janë shumëfishuar që atëherë.

“Ehsan Afresteh, një spiun i trajnuar nga Mossadi në Nepal i cili i shiti informacione të ndjeshme Izraelit, u ekzekutua”, raportoi agjencia e lajmeve Mizan, një organ i gjyqësorit.

“Pasi u arrestua dhe u gjykua për spiunazh dhe bashkëpunim me regjimin sionist, ai u var  të mërkurën pasi… vendimi u ratifikua nga Gjykata Supreme”, sipas të njëjtit burim.

32-vjeçari ishte burri i gjashtë që u ekzekutua për spiunazh për Izraelin që nga shpërthimi i luftës, sipas një numërimi nga OJQ-ja me seli në Norvegji Iran Human Rights (IHR).

Sipas informacioneve nga kjo dhe një OJQ tjetër, Hengaw, rrëfimi i të riut, i cili u dënua në qershor 2025, u nxor nëpërmjet torturës.

Një iranian i dytë, Mohammad Abbasi, u var gjithashtu dje, sipas Mizan. Ai u dënua për vrasjen e një oficeri policie gjatë protestave antiqeveritare në janar.

Sipas Agjencisë së Re të Aktivistëve të të Drejtave të Njeriut (HRANA), 55-vjeçari ishte një “protestues i thjeshtë”, ndërsa Mizan e përshkroi atë si një “terrorist”, duke thënë se ai ishte pjesë e një grupi që sulmoi forcat e rendit.

Organizatat e të drejtave të njeriut, përfshirë Amnesty International, vlerësojnë se Irani është vendi i dytë më i madh që ekzekuton në botë, pas Kinës.

Të hënën, autoritetet iraniane njoftuan ekzekutimin e një studenti të inxhinierisë aeronautike i cili u akuzua për spiunazh për shërbimet e inteligjencës izraelite dhe amerikane.