Irani nuk i është përgjigjur ende propozimit të paraqitur nga Shtetet e Bashkuara për t’i dhënë fund konfliktit, ndërsa diskutimet mbi tekstin përfundimtar të marrëveshjes po vazhdojnë në Teheran.

Sipas një burimi pranë ekipit negociator iranian, i cituar nga Mehr News, autoritetet iraniane po e analizojnë me kujdes propozimin amerikan për shkak të mungesës së besimit ndaj Uashingtonit dhe precedentëve të mëparshëm që, sipas Teheranit, tregojnë mosrespektim të marrëveshjeve nga ana e SHBA-së.

Burimi theksoi se procesi i shqyrtimit po zhvillohet me kujdes dhe se Irani synon të sigurojë garanci të qarta përpara se të marrë një vendim përfundimtar.

“Bazuar në përvojat e kaluara, Irani po kërkon përfitime të prekshme dhe reale”, deklaroi burimi, duke nënvizuar se Teherani nuk do të mjaftohet me zotime politike pa mekanizma konkretë zbatimi.

Zhvillimi vjen në një moment delikat për përpjekjet diplomatike, teksa palët po kërkojnë të arrijnë një marrëveshje që do t’i jepte fund përshkallëzimit të konfliktit dhe do të hapte rrugën për negociata më të gjera mbi sigurinë dhe stabilitetin në rajon.