Robert Del Naja, vokalisti i grupit Massive Attack, ishte mes më shumë se 500 personave të arrestuar gjatë një demonstrate të madhe në qendër të Londër, kundër ndalimit të organizatës Palestine Action. Protesta u zhvillua të shtunën në Trafalgar Square, ku qindra qytetarë u mblodhën për të kundërshtuar vendimin ndaj organizatës. Demonstrata përfundoi me arrestime masive nga autoritetet.
Del Naja, i njohur edhe me pseudonimin “3D”, mbante një pankartë me mesazhin: “Unë kundërshtoj gjenocidin, unë mbështes Palestine Action”. Kur u pyet për arrestimin, ai deklaroi: “Po arrestohem në mënyrë të paligjshme”. Para arrestimit, muzikanti kishte pranuar se ishte i vetëdijshëm për pasojat e mundshme në karrierën e tij, përfshirë kufizime në udhëtime apo viza. Megjithatë, ai e cilësoi këtë shqetësim si “absurd” dhe theksoi se pjesëmarrja në protestë ishte e domosdoshme.
Ai i përshkroi veprimet e Palestine Action si “patriotike”, duke argumentuar se synojnë të parandalojnë përfshirjen e vendit në krime të mundshme lufte. Në shkurt, Gjykata e Lartë e Mbretërisë së Bashkuar e cilësoi ndalimin e organizatës si “joproporcional dhe të paligjshëm”, duke vendosur se aktivitetet e saj nuk përmbushin kriteret për t’u klasifikuar si terroriste. Megjithatë, në mars, Policia Metropolitane e Londrës njoftoi se do të vazhdonte arrestimet e personave që shprehin mbështetje për grupin, duke çuar në përplasjet e fundit gjatë protestës.
Në një video të publikuar në rrjet, Del Naja shihet teksa afrohet nga oficerët e policisë, të cilët e informojnë për arrestimin dhe e largojnë nga vendi i ngjarjes, ndërsa turma reagon me duartrokitje.
View this post on Instagram
