Fitorja më përmbysje e Juventusit dhe tri pikët e mara që afrojnë “Zonjën e Vjetër” me kualifikimin në fazën tjetër të Champions League kanë bërë që mediat italiane të shpërthejnë në elozhe për skuadrën e Maurizio Sarri. Faqet e para të gazetave përtej Adriatikut janë pushtuar nga foto e Paulo Dybala.

Sulmuesi ishte njeriu i suksesit për juventinët, që sipas mediave italiane, tashmë i ka të gjithë mundësitë të triumfojë në Europë. E njëjta atmosferë përcillet edhe në të përditëshmet angleze, pas fitoreve të thella të Tottenham dhe Manchester City.

Nëse suksesi i skuadrës së Guardiola ishte i pritshëm, ai i formacionit londinez kishte më shumë vlera për shkak të ecurisë negative të ekipit të drejtuar nga Pochettino.

Festojnë fitoren e Real Madrid të përditëshmet spanjolle dhe sidomos ato madrilene, që gjithsesi vazhdojnë të nënvizojnë faktin se si skuadra e Zinedine Zidane është shumë larg asaj që dominonte në Champions.

Ndërkohë, në Francë ekzaltojnë Paris SG, rekordin e Kylian Mbappe dhe sigurisht Mauro Icardi si një blerje të goditur të parizienëve.
(balkanweb)