Një i ri i ardhur nga diaspora ndau historinë e zbrazjes së vendlindjes së tij në qarkun e Kukësit gjatë fjalës në protestën para Kryeministrisë, duke apeluar për mbrojtjen e fshatit dhe për një frymë të re politike në vend.

I riu tregoi me dhimbje realitetin e braktisjes së zonave rurale dhe rënien e prodhimit vendas si pasojë e emigrimit masiv:

“Sa herë kthehem në Shqipëri më dhemb zemra të shoh shqiptarët, të shoh fshatin tim, që janë braktisur. Lagja ime në Kukës në vitet ’90 kishte rreth 60 familje, tani kanë ngelur vetëm 3 familje! Dhe fshati po braktiset, të gjithë po ikin. Pasuria e Shqipërisë është fshati dhe nga aty rrjedh prodhimi real! Kjo po zhduket nga kjo politikë shkatërruese!”

Më tej, ai apeloi për ndërgjegjësim mbarëpopullor dhe kërkoi largimin e klasës aktuale politike:

“U bëj thirrje të gjithëve: të bashkohemi dhe ta heqim këtë politikë e të vijë politika e re shqiptare, e shqiptarëve, e Shqipërisë së lirë! Poshtë tradhtarët, rroftë Shqipëria!”