Deputeti i Partisë Mundësia, Erald Kapri, ka deklaruar se eurodeputetë dhe zyrtarë të lartë europianë kanë shprehur shqetësim për situatën në Shqipëri, veçanërisht sa i përket luftës kundër korrupsionit dhe pavarësisë së drejtësisë.

Në një lidhje të drejtpërdrejtë për programin e drekës në News24 nga Parlamenti Europian në Strasburg, Kapri tha se gjatë takimeve të zhvilluara në ditët e fundit, një nga çështjet që ka ngjallur reagim tek zyrtarët europianë ka qenë votimi në Kuvend kundër heqjes së imunitetit të zëvendëskryeministres Belinda Balluku.

Sipas tij, përfaqësuesit europianë e konsiderojnë të rëndësishëm forcimin e rolit të SPAK në luftën kundër korrupsionit, si edhe garantimin e pavarësisë së sistemit të drejtësisë.

“Në takimet që kam zhvilluar kanë shprehur shqetësim për luftën ndaj korrupsionit dhe pavarësinë e gjyqësorit. Për shumë nga ata eurodeputetë dhe zyrtarë që kam folur ka qenë e papranueshme votimi kundër heqjes së imunitetit të Belinda Ballukut në Parlament”, u shpreh Kapri.

Ai deklaroi më tej se “beteja politike” e kryeministrit Edi Rama për të mbrojtur Ballukun në Kuvend po ndikon negativisht në procesin e integrimit europian të Shqipërisë.

“Një gjë mund ta themi me bindje, se beteja që Rama bëri për të mbrojtur Ballukun në Parlament ka cenuar dhe po vonon integrimin e Shqipërisë në BE”, tha ai.

Kapri theksoi se mbështetja e partnerëve europianë për Shqipërinë mbetet e madhe, por paralajmëroi se sjellja e mazhorancës mund të krijojë probleme serioze nëse vazhdon në të njëjtën linjë.

“Ne kemi hapur negociatat, por sfida është mbyllja e tyre. Nëse do krijojmë pengesa të tilla, të çojmë sinjale në Bruksel duke mbrojtur të korruptuarit, integrimi ynë vendoset në rrezik”, deklaroi ai.