Mijëra qytetarë kanë mbushur rrugët e kryeqytetit peruan, Lima, për të mirëpritur Papa Leon XIV, në mbërritjen e tij në vend. Sipas autoriteteve lokale, turma të mëdha besimtarësh kanë dalë për të përshëndetur Atin e Shenjtë, duke festuar nisjen e etapës së fundit të vizitës së tij gjashtëditore në Amerikën e Jugut.

Për Papa Leon XIV, kjo vizitë ka një domethënie të veçantë personale, pasi Peruja është vendi ku ai kaloi disa dekada të jetës së tij, duke krijuar lidhje të forta me popullsinë vendase.

“Është një burim gëzimi të thellë për mua të kthehem në Peru. Ky rikthim ka një kuptim shumë të veçantë për mua”, deklaroi Papa gjatë fjalimit të tij të parë në Lima, në Teatrin Kombëtar.

“Po kthehem në atdheun tim”, u shpreh ai, duke kujtuar vitet e kaluara në vend dhe mikpritjen që kishte marrë nga familjet peruane.

“Shumë më hapën dyert e shtëpive të tyre, ndanë ushqimin me mua duke më bërë të ndihesha si një prej tyre”, tregoi Papa.

Ai kujtoi gjithashtu se në vitin 2015 mori shtetësinë peruane, një gjest që, sipas tij, vulosi lidhjen e veçantë të krijuar ndër vite me këtë popull.

“Unë kthehem si Pasardhës i Pjetrit për t’i shërbyer Kishës universale”, përfundoi Papa Leon XIV.