TIRANE- Regjistrimi i titujve të pronësisë brenda 4 viteve do të sjellë rritjen e eksporteve shqiptare në bujqësi.
Ministri i Bujqësisë, Niko Peleshi shpjegoi gjatë seancës plenare se i hapin rrugë rritjes së eksporteve në fushën e bujqësisë ndërsa dha edhe disa shifra lidhur me rritjen e eksporteve në 2017.
“Titujt e pronësisë i hapin rrugën konsolidimit të tokës, transaksioneve të tokës bujqësore, kooperimit apo fermave me kontratë me pikat e grumbullimit që janë mbështetur shumë këto katër vite dhe kanë qenë shkaku kryesor pse eksportet shqiptare në fund të vitit 2017 në bujqësi, ishin 20% më të larta sesa në fund të vitit 2016.
Skemën e ndihmës ekonomike, Peleshi e konsideroi si kalim, nga psikologjia e mbijetesës të qeverisë së kaluar, te psikologjia e punës dhe e jetës me dinjitet.
“Është kalimi nga një skemë e korruptuar në një skemë të bazuar në kritere objektive të ndërtuar me ekspertizën më të mirë të Bankës Botërore, të testuar në 3 qarqe dhe tani gati për t’u përhapur në të gjithë Shqipërinë”, sqaroi ministri.
Duke u ndalur tek situata e krijuar ndër vite në bujqësi, Peleshi bëri fajtore opozitën për situatën e krijuar ndër vite, ndërsa deklaroi që qeveria ka shumëfishuar investimet në këtë sektor, për fuqizimin e bujqësisë në vend.
“Trashëguam një bujqësi me 89% të fermerëve me pak tokë, 2/3 e sipërfaqes së tokës pa ujë, pjesa me e madhe e tokës pa kanale kulluese, nuk u bë asgjë reale për të nxitur kooperimin, si një nga formulat që lufton varfërinë në fshat dhe rrit të ardhurat e ekonomisë bujqësore. Në 2012 skema e mbështetjes ishte 7 milionë euro, ndërsa sot është trefishuar. Sot është 20 milionë, pa harruar këtu edhe 94 milionë euro të programit të qeverisë shqiptare të mbështetur nga Bashkimi Europian”, përfundoi Peleshi.
(BalkanWeb)
