SHKUP
Ambasada e SHBA në Shkup ka reaguar pas parandalimit të një sulmi terrorist ng struktura të ISIS në Maqedoninë e Veriut. Ambasada e SHBA-së në Shkup paralajmëroi se është rritur rreziku nga sulmet terroriste.
Përmes një njoftimi në faqen zyrtare, Ambasada amerikane thotë se qytetarët janë objekt i terroristëve të ISIS-it.
“ISIS ka për qëllim që t’i sulmojë qytetarët, duke përfshirë edhe qytetarët amerikan që udhëtojnë jashtë shtetit. Terroristët po përdorin gjithnjë e më shumë metoda më pak të sofistikuara”-thuhet në faqen zyrtare të Ambasadës së SHBA-së në Shkup.
“Ekziston rrezik i lartë i sulmeve terroriste të frymëzuar nga ideologjitë ekstremiste në Maqedoninë e Veriut. Sulmet terroriste dhe incidentet tjera të sigurisë shpesh ndodhin pa asnjë paralajmërim, ndërsa qytetarët e SHBA-së inkurajohen që të jenë të vëmendshëm. Ekstremistët më shumë tentojnë të identifikojnë dhe të sulmojnë “objektivat e mëdha” siç janë qendrat tregtare dhe tregjet, aeroportet, hotelet, klubet dhe restorantet, vendet e adhurimit, shkollat, mitingjet partiake, demonstratat, festat”- shkruhet më tej në faqen zyrtare të Ambasadës amerikane në Shkup.
(BalkanWeb)