Kompania më e madhe e shkëmbimit të kriptomonedhave në botë, Binance, po hetohet edhe nga autoritetet franceze, pas nisjes së hetimit nga pala amerikane.
Hetimi është fokusuar në procedurat financiare të kompanisë sa i përket pastrimit të parave. Vetëm pak ditë më parë Binance u largua zyrtarisht nga tregu në një tjetër vend europian, Holanda, pasi dështoi të merrte një licencë nga banka qendrore holandeze.
Në një deklaratë, Binance konfirmoi se autoritetet franceze vizituan zyrat e kompanisë javën e kaluar.
“Ne patëm një vizitë në terren javën e kaluar nga autoritetet përkatëse. Binance, si gjithmonë, ishte bashkëpunuese dhe përmbushëm detyrimet tona në përputhje me rrethanat ligjore. Ne vazhdojmë të punojmë ngushtë me rregullatorët dhe agjencitë e zbatimit të ligjit për të gjitha kërkesat e vazhdueshme për të mbështetur standardet ligjore”, tha një zëdhënës i kompanisë.
Rregullatorët në mbarë botën janë përpjekur të rrisin presionin mbi kompanitë e shkëmbimit të kriptovalutave në një përpjekje për t’i bërë ato më transparente, pas incidenteve të vazhdueshme në këtë industri.
Në SHBA, Binance është duke u përballur me padi nga dy rregullatorë financiarë, Komisioni i Letrave me Vlerë dhe Shkëmbim (SEC) dhe Komisioni i Tregtisë së të Ardhmeve të Mallrave, sipas të cilëve kompania ka operuar në SHBA në mënyrë të paligjshme dhe duke injoruar ligjet që synojnë të mbrojnë investitorët.