Në ditët e fundit sulmet me dronë dhe raketa në bazat ushtarake në Irak dhe Siri kanë plagosur gjithsej 21 personel ushtarak amerikan, sipas Pentagonit. Ata kanë pësuar lëndime të lehta, megjithëse një kontraktues civil gjithashtu vdiq nga një “incident kardiak” teksa strehohej pas një sulmi të mundshëm.
Trupat amerikane dhe të koalicionit janë sulmuar të paktën 12 herë në Irak dhe katër herë në Siri, që nga fillimi i konfliktit midis Izraelit dhe Hamasit. Zyrtarët amerikanë ia atribuojnë sulmet grupeve iraniane që veprojnë në rajon. Irani mbështet Hamasin dhe Hezbollahun në Liban me armë dhe para.
Shtetet e Bashkuara kanë rreth 900 trupa të stacionuara në Siri dhe 2500 në Irakun fqinj. Të enjten, Shtetet e Bashkuara thanë se po lëviznin 900 trupa të tjera në rajon. Më herët, Shtëpia e Bardhë tha se Joe Biden e paralajmëroi Iranin kundër sulmit të personelit amerikan në Lindjen e Mesme, nëpërmjet një mesazhi të rrallë drejtuar liderit suprem të Iranit, Ayatollah Ali Khamenei.
(BalkanWeb)
