Autoritetet malajziane kanë nxjerrë të mërkurën trupat e pajetë të pesë personave që ndodheshin në bordin e një helikopteri të shërbimit mjekësor, i cili u rrëzua një ditë më parë në ishullin Borneo.

Helikopteri u rrëzua pranë pistës ajrore Long Lellang, në veri të Sarauakut, një zonë e thellë dhe e largët ku shërbimet shëndetësore janë të vështira për t’u aksesuar. Shërbimi “Flying Doctor” përdoret për transportimin e ekipeve mjekësore drejt komuniteteve të izoluara.

Viktimat janë piloti dhe katër punonjës të shëndetësisë. Autoritetet kanë nisur procesin e identifikimit zyrtar të trupave, ndërsa shkaqet e aksidentit mbeten ende të paqarta.

Hetuesit po shqyrtojnë edhe kushtet atmosferike, pasi në javët e fundit Sarauaku është përfshirë nga mjegulla e dendur e shkaktuar nga zjarret pyjore në Indonezinë fqinje.

Kryeministri malajzian Anëar Ibrahim shprehu ngushëllimet për familjet e viktimave dhe u bëri thirrje qytetarëve të shmangin spekulimet deri në përfundimin e hetimeve. Qeveria ka garantuar mbështetje për familjarët, ndërsa autoritetet e Sarauakut kanë njoftuar edhe ndihmë financiare e mbulimin e tarifave të shkollimit për fëmijët e viktimave.