Një ditë pas njërit prej sulmeve më të rënda të Rusisë ndaj Kievit që nga pushtimi i plotë në vitin 2022, Moska u paralajmëron banorëve të huaj dhe diplomatëve të largohen nga kryeqyteti i Ukrainës, pasi thotë se nuk ka ndërmend të ngadalësojë sulmet e saj.

Rusia u ka thënë qytetarëve të huaj dhe diplomatëve që jetojnë në Kiev të largohen nga qyteti, duke paralajmëruar se planifikon të nisë sulme të tjera në kryeqytetin ukrainas dhe “qendrat e tij të vendimmarrjes”.

Paralajmërimi për evakuim vjen një ditë pasi Rusia nisi një valë masive sulmesh me raketa dhe dronë në një nga sulmet e saj më të mëdha në Kiev që nga viti 2022, duke lënë dy persona të vdekur dhe më shumë se 90 të plagosur.

“Në rrethanat aktuale, Forcat e Armatosura Ruse po fillojnë të nisin sulme sistematike kundër objekteve ushtarako-industriale ukrainase në Kiev”, tha Ministria e Jashtme e Rusisë në një deklaratë.

“Sulmet do të synojnë si qendrat e vendimmarrjes ashtu edhe postet komanduese… Ne po i paralajmërojmë qytetarët e huaj, përfshirë personelin e misioneve diplomatike dhe organizatave ndërkombëtare, të largohen nga qyteti sa më shpejt të jetë e mundur”, tha ai.

Presidenti rus Vladimir Putin pretendon se sulmi ishte hakmarrje për një sulm ukrainas disa ditë më parë në një shkollë profesionale që vrau 21 persona në rajonin e Luhanskut të pushtuar nga Rusia.

Më herët këtë muaj, Rusia u bëri thirrje qytetarëve të huaj dhe diplomatëve të largohen nga Kievi, kur kërcënoi me sulme masive në qendër të kryeqytetit nëse Ukraina do të ndërpriste një paradë ushtarake në Sheshin e Kuq.