Përmes një letre të hapur, drejtuar kryeministrit Edi Rama, ministres së Jashtme Olta Xhaçkës dhe atij të Turizmit, Blendi Klosi, Shoqata e turoperatorëve të Shqipërisë, kanë kërkuar, kanë ngritur shqetësimin se konsullata shqiptare në Ankara ka refuzuar vizat për 48 turistë nga Iraku të cilët kishin paguar paketën e udhëtimit në vendin tonë.
Në letrën e tyre, shoqata bën me dije se irakianet që do të vinin në Shqipëri janë mjekë, e në vendin tonë, do të realizonin një seminar.
Më tej, shoqata, e cilëson vendimin e Konsullatës shqiptare në Ankara si të pa bazuar me kriteret dhe rregullat në fuqi. Ato kërkojnë nga kryeministri dhe dy ministrat, hetim të veprimeve të Konsullatës shqiptare në shtetin turk.
Letra e plotë:
Nr ____ Prot Tiranë, më 17.07.2021
LETER E HAPUR drejtuar:
Kryeministrit të Shqiperisë, Z. Edi Rama,
Ministrit për Europën dhe punët e Jashtme Znj. Olta Xhaçka
Ministrit të Turizmit dhe Mjedisit Z. Blendi Klosi.
Duke përshëndetur heqjen e vizave pr qytetarë të disa vendeve të Lindjes së Mesme që duan të vizitojnë Shqipërinë apo të bëjnë pushime në vendin tonë, ju prezantojmë një veprim krejtësisht të pa justifikuar të Konsullatës sonë në Ankara, e cila ju refuzoi vizat një grupi prej 48 personash, turistë Irakianë, të cilët kishin paguar paketën e një udhëtimi turistik në Shqipëri.
Duke qënë se Iraku nuk u përfshi në vendet për të cilat Qeveria Shqiptare hoqi regjimin e vizave, Turistët nga Iraku janë të detyruar të paisen me viza turistike nga konsullata jonë në Turqi.
Përpjekjet e Operatorit Turistik shqiptar dhe Partnerit Irakian, i cili dy muaj më parë erdhi dhe bëri një vizitë në Shqipëri për të studiura mundësitë për sjelljen e grupeve të turistëve nga Iraku, dështuan pa filluar akoma. Turistët Irakianë ishin përzgjedhur nga Operatori Irakian, që të ishin njerëz me profesione, të kishin udhëtuar më parë si turistë në vende të ndryshme dhe të kishin një nivel ekonomik të përshtatshëm për të bërë udhëtime turistike.
Për grupin prej 48 personash u organizuan rezervimet për fluturime dhe Hotelet ne Shqipëri. U bë aplikimi për viza online dhe iu kërkua – e theksojmë – iu kërkua të paraqisnin biletat dhe hotelet e paguara. Për 48 persona operatori irakian u detyrua te paguante rreth 30 mijë USD për biletat e avionit dhe rreth 3500 Euro për vizat. Gjithashtu u parapaguan Hotelet në Shqiperi.
Refuzimi masiv i kërkesave për vizë turistike është për ne një sjellje e pa justifikuar dhe e pa bazuar në kriteret dhe rregullat në fuqi. Ne mendojmë dhe jemi të bindur se paragjykimet të cilat kanë dominuar në marrjen e këtij vendimi refuzimi, janë shumë të dëmshme dhe minojnë perpjekjet e Operatoreve Turistike vendas dhe të huaj për zhvillimin e Turizmit dhe zgjerimin e hartës së vendeve nga të cilat Shqipëria pret Turistë.
Ne përbërjen e Grupit prej 48 Turistësh Irakianë, ishin 30 Mjekë dhe Doktorë të cilëve ju refuzua viza pa asnjë të drejtë. Çdo vendim për refuzimin e hyrjes në Shqipëri duhet të jetë i bazuar në të dhënat individuale të secilit e jo në paragjykimin se çdo Irakian është një azilkërkues…. Doktorët Irakianë që do të vinin për një seminar apo konferencë të akomoduar në hotelin më të mirë me 5 yje në Tiranë, dhe që planifikuan të qëndronin edhe 3 ditë më tepër në një nga hotelet më luksoze në Sarandë, të jenë të gjithë kontigjentë per t’u refuzuar? Edhe 20 pjesëtarët të një grupi tjetër irakiën, me vula dhe viza të përdorura hyrjesh në shtete europiane, USA a Kanada, Turqi a Egjipt, të ishin të gjithë për t’u refuzuar?
Krahas humbjeve të konsiderueshme që u janë shkaktuar individëve edhe Operatorëve Turistikë nga parapagimet e Biletave dhe Hoteleve që janë pothuaj të pa kthyeshme, një humbje edhe më e madhe po i shkaktohet sektorit të Turizmit dhe imazhit të Shqipërisë si një destinacion nderkombëtarë.
Shoqata ATOA me anë të publikimit të kësaj letre të hapur, kërkon nga autoritetet shtetërore, hetim të veprimeve të konsullatës Shqiptare në Ankara dhe transparencë për ligjshmërinë e këtyre veprimeve sabotuese të punës së Operatoreve Turistikë.
Me respekt,
Shoqata Shqiptare e Turoperatorëve dhe Agjencive Turistike
(BalkanWeb)
