TIRANË – Avokati i Fredi Belerit, Geni Gjyzari, në një deklaratë të shkurtër për mediat tha se e priste këtë vendim për kryebashkiakun e zgjedhur të Himarës.
Ai tha se kryetari i seancës së sotme ishte vazhdimisht në tension, duke shtuar se Belerit i është ndërprerë fjala. Avokati deklaroi se vendimi do të ankimohet, ndërsa nënvizoi se vendimi është dhënë me urdhër të kryeministrit Edi Rama.
“Kryetari i seancës e ndërpreu diskutimin e zotit Beleri, teksa ka transmetuar tensionin që kishte jashtë këtij procesi. Tensioni i tij nuk na la të dyshojmë se Beleri do të dënohej. E padëgjuar ndonjëherë, ai ia ndërpreu fjalën zotit Beleri, të pandehurit pra.
Është e padëgjuar. Është dhe një vendim politik. Siç e porositi kryeministri, ashtu mori vendim edhe gjykata. Prokuroria nuk ka sjellë asnjë provë, aktet proceduriale janë të gjitha të falsifikuara. Është ndjekur 4 ditë nga policia i dyshuari pa vendim Prokurorie, që është skandal. Prokuroria këtë qëllim kishte, ra nën presionin e policisë”, tha avokati i Belerit.
(BalkanWeb)
