“KQZ nuk mund të jetë më një organ politik, i cili ruan privilegjin e partive të mëdha”. Kështu deklaroi sot në parlament Ministrja e Shtetit për Marrëdhëniet me Parlamentin, Elisa Spiropali, duke shtuar se, Europa është një qasje të cilën fatkeqësisht opozitarët tonë nuk e duan.
“Le të bëhet drejtësi pa dhe bota të përmbyset. I uroj shumë suksese Prokurorit të Përgjithshëm por edhe të gjitha institucioneve të tjera të drejtësisë për të kryer punën e tyre pavarësisht zhurmës dhe tronditjeve serioze që kanë shkaktuar në politikën shqiptare. Në rast se do i ktheheshim dhe diskutimeve të mëparshme për sa i përket integrimit dhe progresit që Shqipëria ka bërë, qoftë dhe reformës zgjedhore, të gjitha lidhen në këtë fije, pikërisht aty të bëhet drejtësi pa dhe bota të përmbyset. Në fakt opozitarët tanë që janë jashtë e kanë përmbysur këtë shprehje, për ta është ‘vetëm drejtësi të mos bëhet pa dhe bota të digjet’. Pikërisht në këtë ngërç të madh duhet ta shohim edhe problemin serioz që kemi ne me shqetësimet që i sjellim vetes sa i përket integrimit në BE. Evropa nuk është një proces abstrakt, nuk është as një proces demokratik apo burokratik. Evropa është një qasje të cilën fatkeqësisht opozitarët tanë nuk e duan për këtë arsye. E para dhe kryesorja drejtësia dhe frika serioze prej saj. E dyta, privilegjet. Po të shikoni të gjithë shqetësimet që kemi ne, për sa i përket reformës zgjedhore, me shkeljen absolute të marrëveshjes së 5 qershorit dhe nevojën për ta riparë atë dhe për ta politizuar KQZ-në dhe organet e tjera është kjo: Të ruajmë privilegjet jo të garantojmë zgjedhjet dhe privilegje vetëm për ne dhe jo për aktorët e tjerë politikë apo aktorët e rinj. E gjitha bëhet në këtë frymë për të ruajtur status quo-n ashtu siç është”, deklaroi Spiropali.
“Për çfarë kishim rënë dakord në atë marrëveshje që u firmos mes palëve. Pikërisht për të ndryshuar skemën e vjetër dhe bajate të përfaqësimit politik jo vetëm në KQZ, por në të gjithë administrimin zgjedhor. Dakord ramë pak a shumë, pa dëshirën tonë, dakord që administrimi zgjedhor në nivelet e tjera nuk mund të ndryshojë tani. Ama KQZ nuk mund të jetë më një organ politik, i cili ruan privilegjin e partive të mëdha, por nuk garanton liritë apo zgjedhjet e qytetarëve shqiptarë”, tha ajo.
“Doli që nuk paska qenë ky problemi. Drejtësia në zgjedhje nuk paska qenë problemi i opozitës. Atëherë mund të më thoni se për çfarë arsye janë hedhur mijëra molotovë drejt institucioneve të shtetit, janë plagosur qindra policë, qytetarë, të keqpërdorur në dyert e institucioneve. Pse u braktis Kuvendi i Shqipërisë? Pse u braktisën zgjedhjet. Çfarë borxhi i kemi ne opozitës jashtë parlamentare e cila thyen edhe këtë marrëveshje të arritur. Nuk i kemi asnjë borxh. Po ne borxh i kemi institucioneve të shtetit dhe qytetarëve shqiptarë. Në këtë institucion në Kuvendin e Shqipërisë ne do të votojmë reformën zgjedhore, patjetër duke negociuar duke mos pasur asnjë tabu dhe duke bërë atë që është e drejtë për qytetarët”, u shpreh Spiropali.
“E para fare e punës ishte që ata e e futën reformën në kushtet e integrimit. Kjo ishte një hile, jo për t’ja shtirë dorën Shqipërisë, por për t’i vënë stërkëmbëshin Shqipërisë, pikërisht aty në pragun e çeljes së negociatave. Të njëjtën gjë po bëjnë tani dhe sado që ne të dakordësohemi. Sado vullnet të kemi dhe sado të madh ta kemi durimin në raport me këtë opozitë ikanake, ajo nuk ka për t’u kthyer sepse po kërkon tani jo arsye për të fituar, sepse për të fituar nuk fiton dot, por alibi për humbjen. Dhe këtu qëndron problemi i mosgjetjes së dakordësisë me opozitën. Sepse nuk ka rrugë për ta gjetur dakordësinë sepse mungesa e dakordësisë buron nga frika e tyre dhe jo nga pasioni për fitoren apo afrimin e zgjedhjeve”, tha ajo.
“Në pikën që jemi patjetër edhe opozitës parlamentare i kemi borxhin për të diskutuar, për të debatuar si shqiptarë, për të parë mënyrat e bashkëpunimit dhe në fund patjetër për të votuar sipas bindjeve tona. Po askush nuk na vë dot ne kushte aq më pak ata që ikën”, tha Spiropali.
