Të paktën 15 persona u vranë në një valë sulmesh me raketa ruse natën e 19-20 gushtit kundër kryeqytetit ukrainas Kiev dhe rajonit përreth, thanë autoritetet ukrainase.

Ndërtesat e banimit dhe depot u goditën në një “sulm masiv” më 20 gusht, sipas Shërbimit Shtetëror të Emergjencave të Ukrainës.

Të paktën 40 persona u plagosën.

Sulmet ndaj Kievit filluan rreth mesnatës sipas kohës lokale, ndërsa sirenat e sulmeve ajrore u dëgjuan në të gjithë qytetin, të pasuara nga goditja e rreth 20 raketave ruse.

Si pasojë e sulmeve ajrore ruse, mijëra ndërtesa mbetën pa energji elektrike, duke zhytur në errësirë ​​pjesë të rajonit të Kievit.

Ministria e Mbrojtjes e Rusisë pretendon se ka shënjestruar një strukturë prodhimi të pjesëve të dronëve dhe një strukturë magazinimi municionesh në Kiev, sipas mediave shtetërore.

BBC nuk mundi t’i konfirmonte në mënyrë të pavarur këto pretendime.

Kryebashkiaku i Kievit, Vitaly Klitschko, tha se spitali i fëmijëve u dëmtua në sulmet e natës, ku u thyen dritaret, si dhe shkolla.

Një qendër industriale në distriktin Solomyansk, në jugperëndim të Kievit, u godit gjithashtu nga raketat, sipas kryetarit të bashkisë.

Një burrë u vra dhe një tjetër u plagos në sulmin në distriktin Brovary në rajonin më të gjerë të Kievit, tha guvernatori rajonal i Kievit, Timur Tkachenko.

Presidenti ukrainas Volodymyr Zelensky përsëriti se vendi i tij mbetet pa raketa mbrojtëse ajrore, duke u bërë thirrje aleatëve perëndimorë për ndihmë.

“Për sa kohë që Ukraina nuk ka mjete të mjaftueshme antibalistike, Rusia nuk do të mendojë seriozisht për paqen”, shkroi Zelensky në Telegram.

“Raketa për sistemin e mbrojtjes ajrore ‘Patriot’ nuk janë dorëzuar ende dhe ato nevojiten çdo ditë.

“Çdo raketë shtesë shpëton jetën e popullit tonë”, shtoi ai.

Duke folur me korrespondentin e BBC-së në Kiev, Dan Johnson, në hyrje të një ndërtese të shkatërruar në Kiev, Klitschko tha se Ukraina ka nevojë për “municione dhe sisteme anti-raketore – ne kemi nevojë për mbështetjen e partnerëve tanë”.

Klitschko ishte në lagjen Solomjan për të vlerësuar dëmet.

Ndërsa ai foli për BBC-në, ekipet e shpëtimit po kërkonin në rrënoja dhe njerëzit qëndronin jashtë shtëpive të tyre të shkatërruara.

Midis tyre ishte Valeria Bondaruk, e cila u zhvendos në Kiev pasi shtëpia e saj në jug të Ukrainës u bombardua, duke besuar se do të ishte më e sigurt me vajzën e saj në kryeqytetin ukrainas.

Tani, për herë të dytë gjatë kësaj lufte, ajo është dëbuar nga shtëpia e saj.

Një copë qelqi e ngulur në murin e dhomës së saj të gjumit dëshmon se sa afër ishte rreziku.

Gjatë natës, ajo u fsheh në korridorin e apartamentit, sepse nuk ka strehë në ndërtesë.

Ajo i tha BBC-së se ka frikë për të ardhmen e vajzës së saj 13-vjeçare dhe po mendon të largohet nga Ukraina.