Dhunimi i mjekes së spitalit Infektiv nga disa familjarë të një pacienti që ndërroi jetë pas një ataku kardiak, është bërë sot pjesë e diskutimit në rubrikën “Opinion” në News24. Për ngjarjen në fjalë janë arrestuar Igli Spahija dhe Bledar Bali ndërsa janë proceduar në gjendje të lirë tre të tjerë.
Pyetjen e moderatores Ola Bruko se; ‘pse dhunohen mjekët?’ e komentuan një panel mjekësh në studio, por dhe në lidhje skype.
Përmes lidhjes skype, Fatmir Brahimaj, kreu i Urdhrit të Mjekut pohoi se asgjë nuk i justifikon aktet e dhunës te bluzat e bardha, jo vetëm atë fizike por dhe atë verbale. Ndërkohë, mjeku Gent Stroni pohoi se raste të tilla ndodhin kur bëhet fjalë për mjekë të urgjencës.
DISKUTIMI
Brahimaj: Asnjë gjë nuk e justifikon kryerjen e akteve të tilla. Nuk është vetëm dhuna fizike, por shpesh kemi dhunë psikologjike apo verbale. Jam dakord që humbja e një jete është e dhimbshme për këdo, jo vetëm për familjarët, por edhe për personelin. Askush nuk dëshiron që të humbë një jetë, por është e pajustifikueshme që të ushtrojmë dhunë. Kërkohet angazhim i të gjithë elementëve të shoqërisë, deri të ligjvënësit që të rishikojnë ligjet që mbrojnë jetën.
Stroni: Kur bëhet fjalë për mjekë të urgjencës, vazhdimisht janë përballë këtyre rasteve. Gjenden në situata të paparashikuara, sepse pacienti ka vajtur jo se ka qenë faji i mjekëve, por sepse ishte i sëmurë, dhe ju garantoj me jetën time që në urgjencë bëhet maksimumi. Duhet të hiqet ky lloj mendimi nga të gjitha shtresat, që fatkeqësisht është vetëm këtu tek ne. Kemi pas një rast nga Kosova, kur një djalë i vetëm ndërroi jetë në duart tona, dhe babai i tij duke parë trishtimin tonë, vinte dhe na rrihte shpatullat. Këtë harbutëri nuk e kam parë. Por duhet bërë një analizë… do duhet që e gjithë shoqëria të orientohet pozitivisht drejt bluzave të bardha, tha ai. Ata që u arrestuan pak ditë më parë nuk ishin mjekë. Por njëri ishte infermier dhe tjetri teknik imazherie. Është gabim i tyre. Njërin e gjetën me 5 mijë lekë të reja në xhep e tjetrin me 1 mijë lekë. S’dua t’i shfajësoj. Pse të gjitha lajmet shkojnë për të ushqyer një urrejtje për mjekët. Media grorifikon të keqen. Ashtu sikurse ne flasim vetëm për të keqen. Ne bëjmë të mundur. Pacienti erdhi pasdite, iu dha shërbimi. Në orën 2 të natës kjo mjeke bëri të mundur që të vinin dhe familjarët, pasi pacienti ishte në momentet e fundit. Ata e sollën në gjendje të vështirë. A mund të ndërroj jetë. Këta barbarë e kanë marrë këtë mjeke në momentin kur ajo po bënte ndihmën te pacienti? Çfarë fituan? Ajo ishte duke punuar bashkë me ranimatorin, dhe u gjet përballë dhunës se tregoi një të vërtetë. Nëse kanë qenë të dehur, është puna e tyre. Këta persona e kanë nisur problematikën në urgjencë dhe dhuna ndodhi në katin e 3. Ata kanë përdorur jo vetëm dhunë te të tjerët, por shkatërruan dhe gjithçka gjetën deri në kat të tretë. Ajo ishte skenë e gjatë terrori. Le ta gjejë policia se si. Kushdo që prek një mjek në detyrë tani dënohet, jo vetëm me gjobë, por dhe me burg.
Mjeku Astrit Bimbashi: Pse goditen bluzat e bardha? Kjo është histori shumë e gjatë. Dikur mjeku ishte institucion dhe gradualisht gjërat ndryshuan. Drama kur ndodh në një maternitet kur një çift del pa fëmijën është tragjike. Ne e dimë se në botë vdes një grua në lindje. Kjo ndodh kudo. Kjo çështja ‘3 vjet burg’ për ne mjekët nuk bën asnjë. Media ka qenë faktor negativ për mjekët. Ne ballkanasit jemi tragjik. Tentativa e fundit është tani ku po tentojmë që të bëjmë një reformë reale në fushën e shëndetësisë. Shpresoj dhe besoj se do të bëhet me punën e të gjithëve. Problemi i dhunës është diçka që nuk e kuptoj. Pse këta njerëz nuk bëjnë dhunë kur shkojnë në privat? Por mendojnë se meqë unë kam paguar më është ofruar maksimumi i shërbimit. Në gjithë botën njerëzit që nuk kanë sillen më mirë se ata që kanë, por në Shqipëri ndodh e kundërta. Që jepet para në shtet, nuk është gjë e pamohueshme. Median nuk e kemi krah.
Stroni: Pse mos t’i shkojë media deri në fund rasteve? Një person që ndërron jetë në spital i bëhet kërkesë për të bërë autopsi. Ne jemi të detyruar që të pyesnim familjarët për të firmosur nëse duan që të bëjnë autopsi. Pse media bën lajm për atë nënë që ndërron jetë gjatë lindjes, dhe s’bën lajm për autopsinë e saj se si ka ndërruar jetë.
Astrit Bimbashi: Çfarë misioni çon media që nxjerrin ulërimat e familjarëve?!
Moderatroja Bruko: Kush i ka mësuar shqiptarët të japin lekë?
Stroni: Kush i ka mësuar këta politikanë të vjedhin?
Brahimaj: Populli kujton se ditën pas zgjedhjeve do të ndodhin të gjitha ato premtime që i janë bërë nga politikanët. Dhe pjesa e stafit mjekësor nuk është ishull qelibar, pasi ka dhe drurë të shtrembër.
(BalkanWeb)
