Ministri i Rindërtimit, Arben Ahmetaj, zbuloi disa nga vendimet që janë marrë për procesin e rindërtimit, pas tërmetit shkatërrimtar të 26 nëntorit.
Në një konferencë për media, ministri Ahmetaj deklaroi se do të përfitojnë nga procesi i rindërtimit edhe ato qytetarë apo familje që kanë pasur ndërtime pa leje.
“Kemi kaluar një vendim specifik për shpronësimet, në funksion të procesit të rindërtimit. Vendimi tjetër është përcaktimi i kushteve dhe kritereve të përfitimit të sipërfaqeve ndërtimore në objektet e reja për banim nga subjektet që posedojnë ndërtime të klasifikuara si ndërtime pa leje. Është një proces dhe procedurë e domosdoshme ligjore, sepse jep mundësinë që edhe aty ku ka ndërtime pa leje, shteti¸ qeveria, duhet të marrë përsipër që ai qytetar, ajo familje, të përfitojnë nga programi i rindërtimit.
Vendimi i fundit është ngritja e Komisionit Shtetëror të Rindërtimit. Përmes një vendimi detajohet funksioni i tij. Logjika e komisionit është propozimi i politikave”, tha ministri.
Më tej, Ahmetaj deklaroi se në pranverën e vitit që vjen të gjitha familjet e prekura nga tërmeti do të kenë gjetur përgjigje të plotë nga programi i rindërtimit.
“Në pranverën e vitit tjetër, besoj se 100% e familjeve kanë gjetur përgjigje të plotë nga programi i rindërtimit, qoftë për rikonstruksion, qoftë për rindërtim, apo ndërtimin e qytezave. Do të ketë një zhvillim urbano-ekonomik të menduar mirë, që t’i shërbejë zhvillimit ekonomik të vendit, por dhe logjikës urbanistike të së ardhmes”, shtoi Ahmetaj.
(BalkanWeb)
