Pekini ka konfirmuar mbajtjen e samitit të parë trepalësh mes udhëheqësve të Shteteve të Bashkuara, Rusisë dhe Kinës. Donald Trump, Vladimir Putin dhe Xi Jinping pritet të takohen të enjten, më 19 nëntor, në qytetin Shenzhen, në juglindje të Kinës, në kuadër të samitit të Bashkëpunimit Ekonomik Azi-Paqësor (APEC).

Takimi është konfirmuar zyrtarisht nga Ministria e Jashtme kineze, pasi ishte paralajmëruar më herët edhe nga Shtëpia e Bardhë dhe Kremlini. Sipas Pekinit, Xi Jinping do të presë presidentin amerikan dhe atë rus, ndërsa deri më tani nuk janë bërë publike detaje të tjera mbi kohëzgjatjen apo axhendën e plotë të bisedimeve.

Në qendër të diskutimeve pritet të jetë kontrolli dhe reduktimi i armëve bërthamore, si dhe lufta e nisur nga Shtetet e Bashkuara dhe Izraeli kundër Iranit më 28 shkurt. Ndërkohë, çështja e luftës në Ukrainë nuk pritet të jetë pjesë e diskutimeve, pasi Kina ka këmbëngulur se çdo negociatë për këtë konflikt duhet të përfshijë edhe vendet evropiane.

Një nga objektivat kryesorë të presidentit amerikan Donald Trump është hapja e një diskutimi për reduktimin e arsenaleve bërthamore në nivel global, me pjesëmarrjen e tri fuqive.

Megjithatë, kjo nismë përballet me rezervat e Pekinit. Kina ka mbajtur prej kohësh qëndrimin se përgjegjësia kryesore për çarmatimin bërthamor u takon Shteteve të Bashkuara dhe Rusisë, të cilat zotërojnë dy arsenalet më të mëdha në botë.

Pekini nuk ka pranuar deri më tani të përfshihet në marrëveshje të ngjashme për kufizimin e arsenalit të tij, duke argumentuar se kapacitetet bërthamore kineze janë dukshëm më të vogla se ato të Uashingtonit dhe Moskës.

Zhvillimet në Lindjen e Mesme pritet të jenë gjithashtu pjesë e bisedimeve në Shenzhen. Konflikti me Iranin, i nisur më 28 shkurt me operacione ushtarake amerikane dhe izraelite, mbetet një nga çështjet që shqetëson diplomacinë ndërkombëtare.

Sipas zyrtarëve amerikanë, tema pritet të diskutohet në takimin mes tre liderëve, në një kohë kur negociatat mes Uashingtonit dhe Teheranit mbeten të bllokuara.

Megjithatë, deri tani nuk është bërë e ditur nëse do të ketë ndonjë nismë konkrete diplomatike apo propozim për ndërmjetësim nga ana e Kinës dhe Rusisë.

Pavarësisht rëndësisë së luftës në Ukrainë, presidenti amerikan nuk pritet ta ngrejë këtë çështje gjatë takimit trepalësh. Një prej arsyeve lidhet me qëndrimin e Pekinit, i cili kundërshton zhvillimin e negociatave për konfliktin pa pjesëmarrjen e Evropës.

Presidenti gjerman Frank-Walter Steinmeier ka zbuluar se gjatë një takimi të fundit me Xi Jinping, ky i fundit kishte reaguar me rezerva ndaj idesë së një procesi negociues vetëm mes SHBA-së, Rusisë dhe Kinës.

Në një intervistë për televizionin publik gjerman ARD, Steinmeier tha se presidenti kinez kishte theksuar se lufta në Ukrainë është një konflikt evropian dhe se vendet e kontinentit duhet të jenë të pranishme në tryezën e negociatave.

Samiti i 19 nëntorit do të zhvillohet në kuadër të takimit të APEC-ut, i cili nis në Kinë më 18 nëntor. Takimi trepalësh pritet të tërheqë vëmendjen ndërkombëtare, për shkak të përfshirjes në të njëjtën tryezë të tre fuqive me ndikim të madh në sigurinë dhe ekonominë globale.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb