VLORE– Pa kaluar 24 orë nga vrasja e 33-vjeçarit Ergys Gjioveshaj dhe plagosjes së tre personave të tjerë në një lokal tek “Uji i Ftohtë” në Vlorë, policia ka zbardhur krimin e rëndë. Blutë kanë arrestuar si autor të dyshuar të krimit 19-vjeçarin, Gani Tozaj banues në fshatin Sevaster, ndërsa në kërkim janë shpallur një 37 vjeçar me iniciale A.K banues në Vlorë dhe 25-vjeçari me iniciale E.S banues në Tiranë.
Por para policisë 19-vjeçari Gani Tozaj ka pranuar se ka qenë bashkëpunëtor.
Ai tha se natën e ngjarjes ndodhej i ulur në një tavolinë në lokal bashkë me kushëririn me inicialet A.K, 37 vjeç. “Arma u shkrep nga kushëriri dhe jo nga unë. Kemi qenë në tavolinën ngjitur me Gjioveshaj”, ka dëshmuar ai para policisë.
Policia sqaron se konflikti ka nisur ndërmjet viktimës dhe autorëve për motive të dobëta duke rrëzuar pistën që u dyshua në fillim ajo hakmarrjes pasi në moshën e adoleshencës, në vitin 2000 Gjioveshaj vrau bashkëmoshatarin e tij në Vlorë. 33-vjeçari u ekzekutua mesnatën e së premtes, në një lokal me muzikë live ku një person i armatosur me pistolete i iu afrua tavolinës ku ndodhej Gjioveshaj dhe qëlloi me breshëri drejt tij. Si pasojë, 33 vjecari mbeti i vdekur në vend me 6 plumba në pjesë të ndryshme të trupit.
Aksidentalisht mbetën të plagosur edhe 3 persona të tjerë që ndodheshin në lokal, mes tyre Arta Luka, 26 vjeçe, që ishte në tavolinë me Gjioveshajn, e cila ka marrë dy plumba në pjesën e barkut. I plagosur lehtë mbeti edhe Florjan Hila 28 vjeç, që ndodhej në tavolinën pranë viktimës, si dhe Arsonel Llanaj 32 vjeç që punonte si kamerier part time, në lokalin e natës. Të tre të plagosurit mësohet se ndodhen jashtë rrezikut për jetën. Në vendngjarje u sekuestruan 1 armë zjarri Pistoletë si dhe 15 gëzhoja fishekësh.
(el.sp/BalkanWeb)