Një anëtar i grupit provokues irlandez të repit Kneecap, i akuzuar për një vepër penale terrorizmi për shkak të mbështetjes së pretenduar ndaj Hezbollahut, pritet të paraqitet sot në një gjykatë në Londër.

Liam O’Hanna, 27 vjeç, i njohur me emrin artistik Mo Chara, u akuzua muajin e kaluar pasi dyshohet se ka shfaqur flamurin e Hezbollahut gjatë një koncerti në Londër në nëntor të vitit të kaluar. Ai do të paraqitet në Gjykatën e Magjistraturës Westminster.

Pamjet nga koncerti duket se tregojnë anëtarin e grupit duke bërtitur: “Rroftë Hamasi, rroftë Hezbollah.” Të dyja organizatat, Hezbollah dhe Hamas, janë të ndaluara në Mbretërinë e Bashkuar dhe mbështetja publike ndaj tyre konsiderohet vepër penale.

Kneecap, i njohur për deklaratat e guximshme kundër Izraelit dhe për dënimin e luftës në Gaza, e cila nisi pas sulmit të Hamasit më 7 tetor 2023, e ka mohuar akuzën dhe ka thirrur fansat që të paraqiten jashtë gjykatës për të mbështetur këngëtarin.

Grupi punk-rap ka deklaruar gjithashtu se videoja që çoi në akuzën penale është nxjerrë jashtë kontekstit. Policia britanike ka bërë të ditur gjithashtu se po shqyrton një tjetër video nga një koncert i grupit në vitin 2023, në të cilën një anëtar thuhet se thotë: “I vetmi Tory i mirë është një Tory i vdekur. Vrit deputetin tënd lokal.”

Në muajin shkurt, grupi postoi një foto në rrjete sociale ku një person me kapuç (duket të jetë anëtar i grupit) shihej duke lexuar një libër me deklarata të liderit të vrarë të Hezbollahut, Hassan Nasrallah.