Gjykatësi federal amerikan John Steele, 77 vjeç, ka ndërruar jetë vetëm pak ditë pasi mori një vendim që shkaktoi debat, duke urdhëruar lirimin nën mbikëqyrje të shtetasit kubanez Michael Guerra Morales, i cili mbahej në paraburgim nga autoritetet amerikane të emigracionit (ICE).
Rrethanat e vdekjes së Steele nuk janë bërë publike, ndërsa nuk ka informacione zyrtare që e lidhin ndarjen e tij nga jeta me vendimin gjyqësor. Guerra Morales ishte dënuar për rrëmbimin e një avioni vendas kubanez në vitin 2003, pasi detyroi ekuipazhin të ulte avionin në Aeroportin Ndërkombëtar të Key West, në Florida. Për këtë ngjarje ai vuajti më shumë se 20 vjet burg për rrëmbim avioni dhe komplot për të penguar ekuipazhin e fluturimit.
Pas lirimit nga burgu, ai u arrestua nga ICE në dhjetor 2025 me synimin për t’u deportuar në Meksikë. Megjithatë, pasi kaloi më shumë se gjashtë muaj në paraburgim, gjykatësi Steele vendosi lirimin e tij nën mbikëqyrje, duke argumentuar se nuk kishte gjasa reale që deportimi të realizohej në një afat të parashikueshëm.
Në vendimin e tij të 8 korrikut, Steele iu referua një precedenti të Gjykatës së Lartë të SHBA-së mbi kufizimet e mbajtjes së zgjatur në paraburgim të personave që nuk mund të deportohen. Sipas gjyqtarit, autoritetet nuk kishin arritur ta deportonin Guerra Morales në Kubë për shkak të mbrojtjes që ai gëzonte sipas Konventës kundër Torturës dhe nuk kishin paraqitur prova se kishin siguruar pranimin e tij nga Meksika.
Steele arriti në përfundimin se “paraburgimi i tij tejkalon gjashtë muaj dhe nuk ka gjasa të konsiderueshme për deportim në një të ardhme të parashikueshme”, duke urdhëruar lirimin e tij nën mbikëqyrje.
Ndërkohë, të mërkurën u bë e ditur se kongresmeni republikan Greg Steube kishte paraqitur një mocion për shkarkimin e gjyqtarit Steele, duke kundërshtuar vendimin e tij në këtë çështje.
