Një 52-vjeçar me pikëpamje radikale në Tiranë u arrestua ditën e sotme pasi prej 6 vitesh kishte ngujuar bashkëshorten dhe 2 fëmijët e tij në banesë duke mos i lejuar të dalin dhe duke i kërcënuar.
Në lidhje me ngjarjen e rëndë gazetarja Klodiana Lala ka siguruar për BalkanWeb dy dëshmi të fqinjëve nga banesa ku 52-vjeçari Gjergj Laçi kishte ‘burgosur’ familjen e tij.
Një prej fqinjëve tregon se kishte rreth 6 vite që nuk i shikonte familjarët e Laçit, ndërsa sipas saj koëht e fundit kur as vetë Laçi nuk dilte nga banesa ushqimin ua siguronte xhamia ose familjarët e tij.
Një tjetër banore e zonës tregon për News24 se Laçi kishte kaluar në depresion kur i prishën banesën e mëparshme dhe se atëherë ka hipur në tarracë dhe ka kërcënuar se do të hidhej. Ajo shton se në banesë nuk kishte energji elektrike ose ujë pasi ata nuk kishin mundësi t’i paguanin dhe se për të larë rrobat bashkëshortja e Laçit ziente një kusi në oborr duke treguar kështu edhe gjendjen e rëndë ekonomike.
“Kishim 5 apo 6 vite që nuk i shikonim. Nuk e dinim çfarë halli kishte. Gjergji dilte, shkonte në xhami, në punë si usta. Fëmijët shkonin në shkollë, njeri i rregullt ne nuk na ka ngacmuar. Gruan e vetë e mbante mbyllur por e mbante mirë, ai e kishte merak. Xhamia u sillte ushqim, çdo gjë që u duhej. Dhe babai e vëllezërit e Gjergjit e ndihmonin, ndërsa familjarët e bashkëshortes nuk e di”, u shpreh një prej fqinjëve
“E kemi njohur familjen prej 30 vitesh, nuk kemi pasur probleme, ishin njerëz të urtë, vinin nga Dibra. Gruan nuk e njoh, që kur i prishën shtëpinë këtu kaloi në depresion. Gjergji herë punonte, herë rrinte pa punë. Gruan nuk e njoh se nuk dilte fare, kohët e fundit e kam parë vetëm 2 herë Gjergjin dhe dukej shumë i stresuar. Shumë pak e kam parë, banesën e kishte rrethuar, nuk kishte drita dhe ujë se nuk i paguanin dot, gruaja lante rrobat duke zierë ujë në kusi në oborr. Kur iu shemb shtëpia hipi në tarracë dhe kërcënoi se do hidhej, u duk që atje që kishte probleme”, u shpreh një tjetër fqinje.
(BalkanWeb)
