KOSOVË

Menjëherë pasi Valdete Bllaca vrau 4 familjarët e saj në Gjilan dhe më pas veten, Inspektorati i Policisë së Kosovës ka pezulluar katër efektivë. Nuk bëhen ende të ditura arsyet se pse janë pezulluar por dyshohet se kanë kryer veprën penale “Keqpërdorim i pozitës apo autoritetit zyrtar”.

Mediat kosovare raportuan sot se Valdete Bllaca kishte probleme psiqike dhe ishte kërkuar që të ulej në grada. Ajo vrau familjarët e saj dhe veten me armën e punës dhe ndoshta tek këto dy pista bazohet edhe IPK për pezullimin e katër efektivëve të stacionit policor të Gjilanit.

NJOFTIMI I INSPEKTORATIT TË POLICISË SË KOSOVËS
Pas raportimit për incidentin në Gjilan ku dyshohej se ishte e përfshirë një zyrtare policore, Inspektorati Policor i Kosovës respektivisht hetuesit e IPK-së kanë dalë në vendin e ngjarjes në lagjen “Bujanina’.

Ekipet e hetuesve të IPK-së në koordinim me Prokurorinë e Shtetit dhe zyrtarë të PK-së kanë ndërmarrë veprime hetimore lidhur me këtë rast me pasoja tragjike.
Bazuar në këto veprime hetimore dhe pas konsultave me Prokurorinë Themelore në Gjilan , Inspektorati Policor i Kosovës pas grumbullimit të informacioneve dhe hetimit paraprak në stacionin Policor Gjilan i ka rekomanduar sot Policisë së Kosovës suspendimin e katër punonjësve të PK-së lidhur me këtë rast.

Rekomandimi për suspendimin e këtyre zyrtarëve (komandantit të stacionit policor, zëvendës komandantit policor, shefit të operativës të stacionit policor dhe një zyrtari të stafit civil) është bërë në interes të hetimit dhe të njëjtit janë duke u hetuar nga IPK me dyshimin së të njëjtit kanë kryer veprën penale “Keqpërdorim i pozitës apo autoritetit zyrtar”.

Veprimet e mëtejshme hetimore lidhur me këtë rast do të vazhdojnë nga hetuesit e IPK-së në konsultim të vazhdueshëm me prokurorin përgjegjës.

(BalkanWeb)