Një superaksion i nisur nga policia kufitare e Vlorës, Delta Forcë, me ndihmën e një helikopteri “Cougar” të FA-së, anijes “Oriku”, GdF në Durrës e Vlorë vijon prej shtatë orësh në det të hapur.

Policia thotë se aksioni nisi që prej orës 13.50 kur u pikas një gomone që lëvizte me shpejtësi.

Ndonëse nuk është kapur ende, policia ka dyshime të shumta që mjeti lundrues mund të jetë fshehur në ndonjë gji mes Kroacisë dhe Malit të Zi, prandaj është kërkuar edhe ndihma e policisë malazeze.

Referuar pamjeve filmike, policia thotë se në bordin e anijes janë pikasur tre persona. Po ashtu, dyshohet se gomonia do merrte lëndën narkotike në Sazan për ta trafikuar në drejtim të Italisë.

Një fakt të tillë e përforcon edhe gjetja e 28 kilogramëve lëndë narkotike të ndarë në 5 pako në gadishullin e Karaburunit, në vendin e quajtur “Bristan”, midis shkëmbinjve.

NJOFTIMI I PLOTE I POLICISE
Delta Forcë, Policia Kufitare dhe D.V.P.Vlorë gjatë kontrollit nga deti dhe toka në zonën e Karaburunit nisur nga informacionet e marra në rrugë operative se mund të ishte fshehur lëndë narkotike me qëllim trafikimi, rreth orës 13.50, kanë konstatuar një mjet lundrues që lëvizte me shpejtësi në drejtim të
Mezo-kanalit, Sazan.

Menjëherë në ndjekie të mjetit lundrues janë vënë 3 mjete lundruese të Policisë Kufitare dhe të Delta Forcë.

Eshtë kërkuar ndihma e anijës “Oriku” dhe e Helikopterit të FA-së.

Gjithashtu është njoftuar GdF Durrës e Vlorë si dhe homologët Italianë.

Menjëherë është ngritur në fluturim një helikopter “COUGAR” i FA-së, i cili ka ndjekur në ujrat neutrale për rreth 1 orë gomonen që lëvizte me shpejtësi duke bërë manovra në det me qëllim ti shmangej ndjekjes së helikopterit.

Nga deti vijonte ndjekja nga anija “Oriku” dhe tre mjete lundrues të Policisë Kufitare dhe Delta Forcë.

Në veprim është futur menjëherë edhe GdF-ja në Shqipëri e Itali.

Deri tani nuk është bërë e mundur kapja e gomones, pasi dyshohet se është fshehur në ndonje gji bregdetar, në ujrat territoriale midis Malit të Zi dhe Kroacisë, por vijon kërkimi nga ajri nga GdF.

Gjithashtu është vënë në ndjekje edhe Policia malazeze.

Nga pamjet filmike të realizuara nga helikopteri i FA në bordin e gomones dallohen tre persona dhe disa bidona plastikë, ndërsa pjesa tjetër e bordit ishte bosh.

Dyshohet se gomonia do merrte lëndën narkotike në Sazan me qëllim trafikimin në drejtim të Italisë.

Nga krehja e zonës në gadishullin e Karaburunit, në vendin e quajtur “Bristan”, midis shkëmbinjve, Policia ka gjetur dhe sekuestruar në cilësinë e provës materiale 28 kilogramë lëndë narkotike të ndarë në 5 pako.

Policia Kufitare, Delta Forcë dhe Drejtoria Vendore e Policisë Vlorë po vijojnë kontrollet në zonë.
(m.a/BalkanWeb)