KOSOVE– President i Republikës së Kosovës, Hashim Thaçi ka reaguar pas miratimit të demarkacionit të kufirit me Malin e Zi. Përmes një statusi në Facebook, Thaçi thotë se Kuvendi i Kosovës i ka dhënë fund paqartësisë politike, sipas tij, të panevojshme rreth vijës kufitare me Malin e Zi.
Sipas tij, Kosova Kosova ka humbur mjaft kohë me këtë çështje, por tashmë ka përmbushur detyrimet e veta dhe qytetarët do të lëvizin lirshëm shumë shpejt në zonën Schengen.

Statusi i plote:
Kosova ka humbur mjaft kohë me këtë çështje, e cila padrejtësisht ngadalësoi hapin shtetëror përpara, duke krijuar ndarje politike e shoqërore, që mbase është vështirë të kompensohen për një kohë të shkurtër. Megjithatë, votat e sotme të deputetëve në Kuvendin e Kosovës janë shpresëdhënëse se ata më s’do të ndikohen nga interesat ditore politike, por nga interesi strategjik i Kosovës.
Konsensusi i gjerë i arritur në Kuvendin e Kosovës duhet të shërbejë si platformë afatgjate e bashkëpunimit ndërmjet subjekteve politike, sidomos kur në pyetje është interesi shtetëror. E pikërisht dialogu për normalizimin e marrëdhënieve ndërmjet Kosovës dhe Serbisë është një çështje e tillë e interesit shtetëror, në të cilën ne duhet të jemi të bashkuar.
Ne i përmbushëm detyrimet tona, prandaj shumë shpejt edhe qytetarët tanë do të lëvizin lirshëm në zonën Shengen, sepse jam i sigurt se edhe BE-ja do t’i bëjë detyrat e saj pa humbur kohë.
Tani duhet që me hapa të përshpejtuar, duke zbatuar pakon e reformave, të krijojmë një dinamikë të re në procesin e anëtarësimit të vendit tonë në BE dhe NATO. HTH.

(d.d/BalkanWeb)