BURKINA FASO – Rreth 170 persona, duke përfshirë gra dhe fëmijë janë ekzekutuar në sulmet në tre fshatra në Burkina Faso, ka thënë një prokuror publik. Aly Benjamin Coulibaly bëri thirrje për dëshmitarë për të ndihmuar në gjetjen e atyre që sulmuan Komsilgan, Nordin dhe Soro-n.

Ushtria paralajmëroi për rrezikun e shtuar të sulmeve nga islamistët, “përfshirë sulmet në qendrat urbane”. Ushtria e vendit mori pushtetin në vitin 2022, por më shumë se një e treta e Burkina Fasos kontrollohet nga kryengritësit. Coulibaly tha se kishte nisur një hetim mbi sulmet e fshatrave në provincën Yatenga më 25 shkurt.

Agjencia e lajmeve AFP raportoi se dhjetëra gra dhe fëmijë ishin në mesin e të vdekurve. Nuk dihet se cili grup qëndron pas sulmeve. Sulmet nuk besohet të jenë të lidhura me situatat e dhunës në të tjera vende të kohëve të fundit – pasi së fundmi janë regjistruar sulme ndaj një kishe, si dhe një xhamie dhe bazave të ushtrisë.

Të premten, shefi i ushtrisë së vendit paralajmëroi ushtarët që të qëndrojnë vigjilentë, për shkak të një rreziku në rritje të sulmeve vetëvrasëse nga militantët. Ai tha se kishte gjithashtu frikë nga një seri sulmesh në shkallë të gjerë kundër forcave të sigurisë në qytete. Punonjësit humanitarë thonë se Burkina Faso po përjeton një nga krizat më të rënda në botë.

Vitet e pasigurisë së shfrenuar kanë detyruar më shumë se dy milionë njerëz të largohen nga shtëpitë e tyre dhe OKB-ja vlerëson se një e katërta e të gjithë fëmijëve nën pesë vjeç kanë probleme në rritje, si pasojë e urisë. Ushtria mori pushtetin dy vjet më parë duke premtuar se do të fitonte betejën kundër rebelëve, megjithatë dhuna vazhdon.

“Epiqendra e terrorizmit tani është zhvendosur përfundimisht nga Lindja e Mesme, në rajonin qendror Sahel të Afrikës Sub-Sahariane,” tha Instituti për Ekonominë dhe Paqen në fillim të kësaj jave.

(BalkanWeb)