Kryeministri Edi Rama deklaroi se garancitë sovrane për kompanitë, nga e cila përfitoi dhe sektori i turizmit, ishin të suksesshme.

Teksa u pyet nga gazetarët për faktin nëse do të ketë një paketë të tretë ndihme për bizneset, për shkak të kushteve të krijuara nga pandemia e COVID-19, Rama e pranoi qartë se kjo gjë nuk do të ndodh.

“Me shumë kënaqësi konstatojmë se goditja në sektorin e turizmit ka qenë më e lehtë se sa ne e parashikonin, për shkak të turizmit të brendshëm dhe turizmit patriotik që u mundësua si rezultat i hapjes që i bëmë kufirin me Kosovën, Malin e Zi, Maqedonisë. Të ardhurat flasin qartë për këtë. Ndërkohë, ka dhe një element tjetër se sektori i turizmit ka në dispozicion një garanci sovrane të rëndësishme. Është ajo garancia e dytë sovrane që thuhej se nuk do të funksiononte. Janë mbi 120 mln dollarë të dhëna për kompani, përfshi këtu dhe ato të turizmit. Kemi shtyrë tatim-fitimin. Për vitin e ardhshëm nuk shoh një paketë të tretë në horizont, që do të thotë se ça flasim, s’kemi parasysh zgjedhjet. Ne mendojmë më shumë se zgjedhjet.”, pohoi kryeministri.
(BalkanWeb)