Një burrë nga Teksasi, i dënuar me vdekje për vrasjen e ish-të dashurës dhe partnerit të saj të ri, u ekzekutua, duke u bërë personi i parë që ekzekutohet në Shtetet e Bashkuara për këtë vit.

Charles Victor Thompson, 55 vjeç, u shpall i vdekur pasi iu administrua një injeksion vdekjeprurës në burgun shtetëror të Huntsville-it. Ai ishte dënuar për vrasjen me armë zjarri, në prill të vitit 1998, të Glenda Dennise Hayslip, 39 vjeç, dhe Darren Keith Cain, 30 vjeç, në periferi të Houstonit.

Sipas prokurorisë, Thompson kishte qenë në një marrëdhënie romantike me Hayslip për rreth një vit, por lidhja përfundoi për shkak të sjelljes gjithnjë e më posesive, xheloze dhe abuzive të tij. Në kohën e ngjarjes, Hayslip kishte nisur një lidhje të re me Cain.

Dokumentet gjyqësore tregojnë se Thompson shkoi në apartamentin e Hayslip, ku u përfshi në një konflikt me Cain. Pas thirrjes së policisë, ai u urdhërua të largohej nga kompleksi i banimit, por u rikthye rreth tre orë më vonë dhe qëlloi me armë zjarri të dy viktimat. Cain humbi jetën në vendngjarje, ndërsa Hayslip ndërroi jetë një javë më pas në spital, si pasojë e plagëve të marra.

“Familjet e viktimave kanë pritur për më shumë se 25 vite që drejtësia të vihet në vend”, kanë deklaruar prokurorët e Zyrës së Prokurorit të Qarkut Harris.

Rreth një orë para ekzekutimit, Gjykata Supreme e Shteteve të Bashkuara hodhi poshtë pa shpjegime apelin e fundit të Thompson, duke i hapur rrugë zbatimit të dënimit me vdekje.