Protestat masive që po zhvillohen në kryeqytet kundër kryeministrit Edi Rama dhe qeverisë së tij kanë hyrë sot në ditën e tyre të 38-të radhazi.
Qytetarë të shumtë janë grumbulluar sërish në bulevardin “Dëshmorët e Kombit” përpara godinës së Kryeministrisë, ku kanë nisur edhe fjalimet e para të aktivistëve dhe protestuesve të pranishëm, duke kërkuar largimin e menjëhershëm të kreut të qeverisë.
Në fjalën e saj para të pranishmëve, protestuesja Luçiana Kokaj ka përcjellë një mesazh të fortë për të gjithë ata që mbështesin këtë kauzë, duke vënë theksin te domosdoshmëria e unitetit dhe kapërcimi i çdo diference politike apo personale për të arritur qëllimin e përbashkët. “Kam një mesazh për ata që mbështesin protestën, të qëndrojmë të bashkuar përtej ndasive të vogla që mund të kemi. Secili mund të ketë ndonjë difekt, ndaj ju bëj thirrje të gjithëve të qëndrojmë të bashkuar dhe të vijojmë protestën,” deklaroi Kokaj nga sheshi para Kryeministrisë.
Më tej, ajo u shpreh mirënjohëse ndaj të gjithë personave që po kontribuojnë në përhapjen e zërit të kësaj kryengritjeje qytetare, ndërsa bëri thirrje që të shmangen thashethemet dhe sulmet e pabazuara brenda rradhëve. “Patjetër jam shumë falënderuese dhe besoj të gjithë bashkë jemi falënderues ndaj atyre që bëjnë një punë fantastike duke shpërndarë protestën, por mos përgojoni njerëz pa ditur të vërtetën,” u shpreh ajo.
Në mbyllje të fjalës së saj, e cila u shoqërua me duartrokitje dhe thirrje në kor nga turma e mbledhur, Kokaj artikuloi kërkesat e qarta të tubimit, duke kërkuar drejtësi dhe ndëshkim për përgjegjësit e situatës në vend. “Çdo ditë e më shumë deri në arritjen e qëllimit tonë, Rama jep dorëheqjen! Rama në burg, Berisha në burg!” përfundoi ajo, duke rikonfirmuar vendosmërinë e protestuesve për të mos u larguar nga sheshi deri në plotësimin e plotë të kërkesave të tyre.
