Korpusi i Gardës Revolucionare Islamike (IRGC) ka njoftuar se ka ndërmarrë një sulm me raketa lundrimi ndaj një objekti që e cilëson si infrastrukturë strategjike amerikane në Bahrein, duke pretenduar se ka goditur qendrën kryesore të të dhënave të kompanisë Amazon në këtë vend.

Në një deklaratë të publikuar nga agjencia gjysmëzyrtare iraniane Tasnim, IRGC tha se operacioni u krye nga Forca e saj Hapësinore dhe se objektivi ishte “infrastruktura qendrore e të dhënave të Amazon”, të cilën e konsideron pjesë të interesave strategjike të SHBA-së. Sipas Teheranit, sulmi është ndërmarrë si hakmarrje për sulmet e fundit amerikane ndaj infrastrukturës civile në rajonin Darhovin të Iranit.

Megjithatë, deri tani nuk ka asnjë konfirmim të pavarur që qendra e të dhënave është goditur apo shkatërruar. As Amazon dhe as autoritetet e Bahreinit nuk kanë dalë me një reagim zyrtar për të konfirmuar pretendimet ose për të dhënë informacion mbi ndonjë dëm të mundshëm. Pretendimet e IRGC-së nuk janë verifikuar në mënyrë të pavarur dhe, edhe në raste të mëparshme gjatë përshkallëzimit të tensioneve në rajon, njoftime të ngjashme të Gardës Revolucionare janë kundërshtuar ose mohuar nga autoritetet lokale dhe burime të tjera.