Momente paniku u regjistruan në një festival në qytetin Zacatlán të Meksikës, pasi një makinë u përplas papritur me një turmë njerëzish, duke shkaktuar kaos dhe përpjekje të menjëhershme të pjesëmarrësve për t’u larguar nga zona.

Të paktën 15 persona mbetën të plagosur nga incidenti, ndërsa autoritetet lokale konfirmuan se nuk ka viktima. Kryetarja e bashkisë së Zacatlán, Betty Sanchez, tha se të plagosurit janë në gjendje të qëndrueshme dhe jashtë rrezikut për jetën.

Ngjarja ndodhi gjatë Gran Feria de la Manzana, Festivalit të Madh të Mollës, një aktivitet i mbushur me vizitorë. Sipas autoriteteve, një automjet tip Chevrolet hyri në zonën e festivalit nga ana e Hotel Zacatlán dhe u përplas me këmbësorët, përpara se të ndalej pasi goditi një strukturë që dukej të ishte një shtyllë betoni. Automjeti përfundoi më pas duke goditur zonën pranë Apple Pavilion.

 

Pas incidentit, në vendngjarje u aktivizuan menjëherë protokollet e emergjencës dhe ekipet e shpëtimit u angazhuan për t’u dhënë ndihmë të plagosurve. Shoferi u arrestua dhe automjeti u sekuestrua nga autoritetet.

Kryetarja e bashkisë tha se ekziston dyshimi se drejtuesi i automjetit mund të ketë pasur një problem shëndetësor në momentin e ngjarjes, i cili mund të ketë shkaktuar humbjen e kontrollit mbi makinën. Megjithatë, autoritetet theksuan se ky version ende nuk është konfirmuar dhe do të duhet të verifikohet përmes ekspertizave përkatëse.

Hetimet vijojnë për të përcaktuar rrethanat e sakta të incidentit dhe shkakun që çoi automjetin të përplasej me turmën.

© BalkanWeb
Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb
Etiketa: