Tre persona u vranë në sulmet ajrore izraelite në Rripin e Gazës të dielën, në një seri sulmesh që ndodhën pavarësisht thirrjeve për të avancuar planin amerikan të paqes për enklavën palestineze të shkatërruar nga lufta. Mbrojtja Civile, agjencia e emergjencave e lidhur me administratën e Hamasit, njoftoi se trupat e tre personave u gjetën pas sulmeve izraelite në al-Qarara, në jug të Rripit të Gazës.

Sipas Spitalit Nasser në qytetin e afërt të Khan Yunisit, viktimat, dy 42-vjeçarë dhe një 28-vjeçar, ishin anëtarë të së njëjtës familje. Një zëdhënës i ushtrisë izraelite i tha AFP-së se po hetonte raportet për sulmin. Mbrojtja Civile tha gjithashtu se sulmet ajrore izraelite vranë tre persona të tjerë në enklavën palestineze të dielën. Ushtria izraelite deklaroi se sulmet kishin në shënjestër anëtarë të Hamasit.

Nickolay Mladenov, i dërguari kryesor në Këshillin e Paqes, organ i krijuar nga presidenti amerikan Donald Trump për zbatimin e planit amerikan të paqes, dënoi sulmet vdekjeprurëse izraelite në Gaza të martën. “Çdo përdorim i forcës që nuk i përgjigjet një kërcënimi të menjëhershëm (…) minon procesin”, tha Mladenov në Këshillin e Sigurimit të OKB-së.

Në fillim të gushtit, Izraeli hodhi poshtë propozimin e fundit amerikan për zbatimin e planit, ndërsa Hamasi e kishte pranuar atë për nisjen e fazës së dytë të marrëveshjes së paqes. Kjo fazë parashikon çarmatimin e lëvizjes islamiste palestineze dhe tërheqjen graduale të trupave izraelite nga territori palestinez.

Kryeministri izraelit Benjamin Netanyahu e ka kushtëzuar çdo tërheqje të trupave me çarmatimin “real” të Hamasit.

Mladenov theksoi gjithashtu se lëvizja palestineze nuk i ka përmbushur angazhimet e saj për çarmatim.