Pas triumfit në garën Sprint, Mark Markez ka marrë edhe “pjatën kryesore”, duke fituar Çmimin e Madh të Aragonit në MotoGP. Pas pilotit të Dukatit u renditën Pedro Akosta me KTM-në zyrtare dhe Marko Beceki i Aprilias, i cili ishte nisur nga “pole position”.

Falë suksesit në garën e trembëdhjetë të sezonit, fitorja e katërt për të këtë vit, të gjitha në gjashtë garat e fundit, Markez bën një tjetër hap të rëndësishëm në klasifikimin e përgjithshëm. Spanjolli i Dukatit i rrëmben vendin e dytë pikërisht Becekit, duke krijuar një diferencë prej pesë pikësh ndaj italianit, ndërsa e shton edhe më shumë presionin në ndjekje të Horge Martinit. Piloti i Aprilias e mbylli garën në vendin e pestë, pas Aleks Markezit, që u rendit i katërti me Dukatin e Gresinit.

Tashmë vetëm 19 pikë, 256 kundrejt 237, e ndajnë fituesin e Aragonit nga Horge Martin. Ndërkohë, Beceki mbetet plotësisht në garë për titullin, me 232 pikë. Momenti vendimtar i garës së djeshme erdhi në xhiron e gjashtë nga 23 gjithsej. “Kanibali” sulmoi Becekin dhe e parakaloi në fund të një dueli spektakolar, në një sprint të shkurtër drejt frenimit në fund të drejtëzës më të gjatë të “MotorLand”-it. Dukati dhe Aprilia u përballën për disa çaste, të ndara vetëm me pak centimetra. Nga beteja përfitoi pjesërisht edhe Akosta, i cili arriti të parakalojë Becekin dhe më pas iu vu në ndjekje Markezit.

Megjithatë, kampioni në fuqi i botës, i cili regjistroi edhe xhiron më të shpejtë të garës, nisi të shkëputej gradualisht dhe në mënyrë të parezistueshme drejt fitores. Pas pesëshes së parë, vendin e gjashtë e zuri Fermin Aldeguer, i ndjekur nga Fabio Di Xhanantonio, Enea Bastianini, Diogo Moreira dhe Brad Binder. Jashtë garës pas një rrëzimi, pak pas çerekut të parë të saj, mbeti Françesko Bagnaia me Dukatin tjetër të ekipit Lenovo. Për tri pilotin nga Piemonte, tri herë kampion bote, ky ishte një tjetër përfundim zhgënjyes i një fundjave që nuk shkoi sipas pritshmërive. Ndalesa e radhës e Botërorit 2026 do të jetë në fundjavën mes datave 11-13 shtator në San Marino.

RADHA E MBËRRITJES

Aragon 2026

PILOTI                      KOHA

1 Mark Markez           0:41:10.969

2 Pedro Akosta            +1.754

3 Marko Beceki          +3.629

4 Aleks Markez           +8.687

5 Horge Martin            +12.572

6 Fermin Aldeguer      +17.687

7 Fabio Di Xhanantonio          +23.136

8 Enea Bastianini        +25.741

9 Diogo Moreira          +25.899

10 Bred Binder            +26.441

11 Xhek Miller            +27.206

12 Xhoan Mir  +27.999

13 Aleks Rins  +28.276

14 Luka Marini           +29.794

15 Johan Zarko           +30.003

16 Pol Espargaro         +35.874

17 Lorenzo Savadori   +49.761

18 Fabio Kuartararo    +51.657

TË TËRHEQUR

Toprak Razgatlioglu

Raul Fernandez

Françesko Banjaja

Franko Morbideli

BOTËRORI 2026/ RENDITJA

PILOTI                      PIKËT           

1 Horge Martin            256

2 Mark Markez           237

3 Marko Beceki          232

4 Fabio Di Xhanantonio          208

5 Ai Ogura                  203

6 Pedro Akosta            189

7 Raul Fernandez        186

8 Françesko Banjaja    143

9 Aleks Markez           128

10 Fermin Aldeguer    90

11 Luka Marini            88

12 Enea Bastjanini      84

13 Bred Binder            78

14 Diogo Moreira        64

15 Fabio Kuartararo    55

16 Franko Morbideli   53

17 Johoan Zarko         36

18 Joan Mir                  33

19 Xhek Miler              28

20 Aleks Rins                  24

21 Toprak Razgatlioglu     14

22 Maverik Vinjales    10

23 Iker Lekuona          9

24 Andre Fernandez    6

25 Pol Espargaro         3