Presidenti rus Vladimir Putin ka deklaruar se ekziston mundësia për arritjen e një marrëveshjeje që mund të çojë drejt zgjidhjes së konfliktit në Ukrainë. Gjatë fjalës së tij në seancën plenare të Forumit Ekonomik Lindor, Putin tha se Rusia është mirënjohëse ndaj të gjithë atyre që po përpiqen të kontribuojnë në zgjidhjen e konfliktit.

“A ka ndonjë mundësi? Sipas mendimit tim, po, ka”, u shpreh presidenti rus, duke theksuar se Rusia dhe Ukraina duhet para së gjithash të arrijnë një marrëveshje mes tyre.

Putin përmendi gjithashtu rolin e Shteteve të Bashkuara dhe Kinës, duke thënë se të dyja vendet po i kushtojnë vëmendje çështjes dhe po përpiqen të kontribuojnë në një zgjidhje paqësore. Sipas tij, edhe presidenti kinez Xi Jinping e ngre vazhdimisht këtë çështje gjatë takimeve me të.

“Në fund të fundit, megjithatë, problemi duhet të zgjidhet nga vendet e përfshira në konflikt, Rusia dhe Ukraina”, deklaroi Putin. Në të njëjtën kohë, presidenti rus përsëriti akuzat ndaj Ukrainës lidhur me paralajmërimet për rreziqet që mund të hasin avionët në hapësirën ajrore ruse, duke i cilësuar ato si “terrorizëm shtetëror”.