Teknologji inteligjente, zgjidhje praktike dhe partneritet profesional në fokus të konferencës së sistemeve të sigurisë

Më 25 shtator 2026, Tirana International Hotel do të mirëpresë një aktivitet të dedikuar teknologjive dhe zhvillimeve më të fundit në industrinë e sigurisë. Konferenca, e organizuar nga Elektrosek në bashkëpunim me Hikvision, do të mbledhë partnerë dhe profesionistë të fushës për të prezantuar zgjidhjet e reja që po ndryshojnë mënyrën e projektimit dhe menaxhimit të sistemeve moderne të sigurisë.
Aktiviteti do të zhvillohet nga ora 09:00 deri në 13:00, në sallën “Arkenia”, dhe do të ketë në fokus jo vetëm prezantimin e produkteve të reja, por edhe aplikimin praktik të teknologjive që u përgjigjen nevojave reale të tregut.

Konferenca do të hapet me fjalën e mirëseardhjes nga përfaqësuesit e Elektrosek, e ndjekur nga prezantimi i kompanisë Hikvision nga Eduart Dedolli, Business Development Manager.
Teknologjitë e reja për mbrojtjen perimetrale

Një nga temat kryesore të konferencës do të jetë mbrojtja perimetrale, ku do të prezantohen teknologjitë dhe produktet e reja Hikvision të projektuara për rritjen e nivelit të sigurisë në objekte civile dhe industriale.

Prezantimi do të drejtohet nga Denis Dunellari, Pre-Sales Manager Hikvision, i cili do të paraqesë zgjidhjet dhe mundësitë që teknologjitë moderne ofrojnë për ndërtimin e sistemeve më inteligjente dhe efikase të sigurisë.

CCTV dhe gjenerata e re e teknologjive Hikvision
Një hapësirë e rëndësishme në program do t’u kushtohet sistemeve CCTV dhe teknologjive të reja si Guanlan, AcuSeek, AcuSense dhe ColorVu 3.0. Këto zhvillime do të prezantohen nga Shirley Li, Product Manager Hikvision, duke sjellë për partnerët një panoramë të zgjidhjeve të reja të videomonitorimit dhe të teknologjive inteligjente që po bëhen gjithnjë e më të rëndësishme në sektorin e sigurisë.

Konferenca synon që prezantimi i teknologjive të mos mbetet vetëm në aspektin teorik, por të lidhet me zgjidhjet praktike dhe nevojat me të cilat instalatorët dhe kompanitë e sigurisë përballen çdo ditë në terren.
Nga kontrolli i aksesit te sistemet kundër zjarrit

Programi do të vijojë me një sesion të dedikuar Access Control dhe Video Intercom, ku do të prezantohen produkte të reja dhe zgjidhje praktike për kontrollin e hyrje-daljeve dhe komunikimin inteligjent.

Një tjetër temë do të jenë sistemet e mbrojtjes kundër zjarrit, me prezantimin e produkteve dhe zgjidhjeve të reja në këtë kategori.

Në pjesën përmbyllëse të konferencës do të prezantohet gjithashtu Hik-Partner Pro, platforma e dedikuar partnerëve dhe profesionistëve të sektorit, si dhe zgjidhjet e reja që ajo ofron.

Një hapësirë për partneritet dhe shkëmbim eksperience
Përtej prezantimeve teknike, konferenca synon të krijojë një hapësirë të drejtpërdrejtë komunikimi ndërmjet profesionistëve të sektorit. Një sesion i posaçëm networking do t’u japë mundësi pjesëmarrësve të shkëmbejnë eksperienca, të diskutojnë sfidat e tregut dhe të krijojnë mundësi të reja bashkëpunimi.

Për Elektrosek, bashkëpunimi me partnerët dhe instalatorët përbën një element të rëndësishëm në zhvillimin e tregut të sistemeve profesionale të sigurisë në Shqipëri. Konferenca synon pikërisht forcimin e këtij komunikimi, duke sjellë më pranë profesionistëve informacionin mbi teknologjitë, produktet dhe zgjidhjet më të fundit të Hikvision.

Aktiviteti do të mbyllet me një përmbledhje të temave të trajtuara dhe me diskutimin e hapave të ardhshëm të bashkëpunimit.