Parlamenti i Ukrainës ka miratuar këtë të martë zgjatjen e ligjit ushtarak dhe mobilizimit të përgjithshëm deri më 29 janar 2027, në një kohë kur vendi vijon të përballet me agresionin ushtarak rus.
Sipas të dhënave të publikuara nga Parlamenti ukrainas, 293 deputetë votuan në favor të zgjatjes së gjendjes ushtarake, duke mbështetur propozimin e paraqitur nga presidenti Volodymyr Zelensky.
Përpara votimit përfundimtar, ligjvënësit kishin rënë dakord që projektligjet përkatëse të shqyrtoheshin përmes një procedure të përshpejtuar, për shkak të situatës së sigurisë në vend dhe vazhdimit të operacioneve ushtarake.
Ky është votimi i 21-të i Parlamentit aktual ukrainas për zgjatjen e ligjit ushtarak dhe mobilizimit të përgjithshëm që prej nisjes së pushtimit rus në shkallë të gjerë, më 24 shkurt 2022.
Zgjatja e këtyre masave u mundëson autoriteteve ukrainase të vijojnë zbatimin e dispozitave të posaçme të sigurisë dhe mobilizimin e personelit për nevojat e Forcave të Armatosura.
Ligji ushtarak parashikon kufizime të caktuara të të drejtave dhe lirive civile, ndërsa mobilizimi i përgjithshëm mbetet një nga mekanizmat kryesorë për sigurimin e forcave të nevojshme në front.
