Australia do të rrisë shpenzimet e mbrojtjes në 3 përqind të produktit të saj të brendshëm bruto deri në vitin 2033, nga rreth 2 përqind që është sot, mes një rritjeje të konflikteve të armatosura në të gjithë botën, tha të martën qeveria e kryeministrit laburist Anthony Albanese. Njoftimi vjen ndërsa Presidenti i SHBA-së Donald Trump vazhdon të ushtrojë presion mbi aleatët e Uashingtonit për të rritur shpenzimet ushtarake.

“Normat ndërkombëtare që dikur kufizonin përdorimin e forcës dhe shtrëngimit ushtarak vazhdojnë të gërryhen”, thuhet në tekstin e një fjalimi të Ministrit të Mbrojtjes Richard Marles që ai do ta mbajë më vonë gjatë ditës, fragmente të të cilit u konsultuan nga Agence France-Presse.

“Sot, numri i vendeve të përfshira në konflikt të armatosur është më i lartë se në çdo kohë që nga fundi i Luftës së Dytë Botërore, dhe ky fenomen është regjistruar në të gjitha rajonet e botës”, do të shtojë ai.

Objektivi i mëparshëm i vendosur nga Canberra – në vitin 2024 – për shpenzimet e mbrojtjes ishte të arrinte 2.3% të PBB-së deri në vitin 2033. Njoftimi i bërë sot do të thotë shpenzime shtesë ushtarake prej 53 miliardë dollarësh australianë (32.2 miliardë euro), sipas zyrtarëve në Ministrinë e Mbrojtjes.

Megjithatë, për të arritur objektivin prej 3%, qeveria australiane ka modifikuar mënyrën se si llogarit shpenzimet e saj ushtarake, duke e përafruar atë me përkufizimin e NATO-s, i cili përfshin elementë të tillë si pensionet e pensionistëve.

E shqetësuar veçanërisht për forcimin e marinës kineze, Australia ka modernizuar pajisjet e saj ushtarake vitet e fundit për të penguar atë që e percepton si një kërcënim nga veriu.

Në vitin 2021, ajo përfundoi marrëveshjen AUKUS me SHBA-në dhe Britaninë për t’u armatosur me nëndetëse me energji bërthamore gjatë dekadës së ardhshme.