Këngëtari i njohur i muzikës popullore të Shqipërisë së Mesme Bujar Cici ishte i ftuar mbrëmjen e kësaj të diele në programin “Dola te Ola”, ku ndër të tjera rrëfeu historinë prekëse të familjes së tij.

“Jam rritur jetim me babanë gjallë”, tha ai, teksa tregoi se babai i tij ka kryer studimet për drejtësi në Gjermani dhe në moshë të re i është caktuar nga Fan Noli për të qenë sekretari i parë i rinisë për diasporën në Amerikë, për bashkimin e Shqipërisë me Kosovën.

Rreth vitit ’62-’63, i ati i Bujar Cicit u kthye në Shqipëri dhe për 3 muaj e mbajtën në hotel “Dajti” për shkak të punës që ai kishte bërë.

Këngëtari tha se më pas i ati u njoh me nënën e tij, e caktuan të fillonte punë si magazinier dhe e dërguan me shërbim në Kukës, ku ende pa mbërritur e ndaloi një makinë shtetërore dhe i tha që e kërkonte Komiteti Qendror. Bujari tregoi se babanë e tij si fillim e dënuan me pushkatim nën akuzën “tradhtar i atdheut” duke e cilësuar “proamerikan”, por me anë të njohjeve familjare u arrit që dënimi të konvertohej në 25 vite burg, nga të cilat babai i këngëtarit bëri vetëm 17 vite pasi në vitin ‘90 doli nga burgu.

Bujar Cici tha se problemi tjetër ishte se ata duhet t’i shpëtonin internimit, dhe për këtë u desh që mamaja e tij të bënte ndarje provizore nga babai. Ata shkuan jetuan te gjyshja, dhe babanë këngëtari e takoi kur ishte 19 vjeç, dy javë para se të shkonte ushtar. Pas viteve ‘90 prindërit e këngëtarit të njohur Bujar Cici u celebruan sërish. Ata jetuan së bashku vetëm 11 vite pasi fatkeqësisht i ati në moshën 67-vjeçare u nda nga jeta, 2 ditë para se djali i këngëtarit të vinte në jetë.