Presidenti amerikan Donald Trump ka njoftuar rritjen e tarifave për makinat dhe kamionët që importohen nga Bashkimi Evropian në nivelin 25%, duke shënuar një përshkallëzim të ndjeshëm të marrëdhënieve tregtare mes Uashingtonit dhe Brukselit.
Në një postim në platformën Truth Social, Trump akuzoi BE-në se “nuk e zbaton marrëveshjen tregtare të dakordësuar plotësisht”, pa dhënë detaje konkrete mbi shkeljet e pretenduara. Ai bëri të ditur se masa e re do të hyjë në fuqi javën e ardhshme.
Aktualisht, tarifat për mallrat që hyjnë në SHBA nga BE-ja janë në nivelin 15%, bazuar në një marrëveshje të arritur verën e kaluar në Turnberry, Skoci. Marrëveshja ishte konsideruar një kompromis, pasi shmangu tarifat më të larta prej 30% që Trump kishte paralajmëruar më herët.
Megjithatë, negociatat për zbatimin e saj kanë ngecur për shkak të mosmarrëveshjeve mbi çelikun dhe aluminin, ndërsa vende kyçe si Gjermania dhe Franca kanë kundërshtuar planet amerikane për rishikimin e tarifave në sektorë të ndryshëm.
Trump u bëri thirrje prodhuesve evropianë që të zhvendosin prodhimin në SHBA, duke theksuar se automjetet e prodhuara në territorin amerikan nuk do të përballen me tarifa. Ai shtoi se investimet në fabrikat e makinave në SHBA kanë arritur nivele rekord.
