Ministri i Brendshëm serb, njëherësh zëvendëskryeministër dhe kryetar i Partisë Socialiste të Serbisë, Ivica Daçiç, ka bërë sërish deklarata provokuese për Kosovën gjatë një tubimi elektoral të mbajtur në Beograd. Gjatë fjalës së tij, ai pretendoi se Prizreni ka qenë kryeqyteti i parë serb rreth tetë shekuj më parë dhe këmbënguli se Serbia nuk do të heqë kurrë dorë nga pretendimet e saj politike ndaj Kosovës, ndërsa haptazi shprehu synimin për të kandiduar për president.

Gjatë fjalimit, politikani serb iu përgjigj kritikave të ish-ministrit gjerman Michael Roth, i cili e kishte ndëshkuar deklaratën e tij të mëparshme se flamuri serb do të valëvitet sërish në Prizren. Daçiç u shpreh se guxon t’i thotë këto fjalë sepse kështu mendon dhe sepse Kosova është mbrojtur me luftë, duke shtuar se lindja e tij në Prizren i jep një arsye më shumë për të mbajtur këtë qëndrim.

Ai krahasoi numrin e banorëve serbë që jetojnë sot në Prizren me atë të dekadave më parë, duke pretenduar se nga 10.000 serbë që jetonin tre dekada më parë, sot kanë mbetur vetëm pak prej tyre. Daçiç deklaroi se kthimi i Serbisë atje mund të mos ndodhë menjëherë, por do të realizohet ashtu siç ka ndodhur edhe në të kaluarën, kur u pritën katër shekuj e gjysmë deri në ngjarjet e Kumanovës.

Në vijim të fjalës së tij, zv.kryeministri serb e cilësoi Kosovën si pjesë të pandashme të Serbisë dhe vlerësoi figurën e ish-presidentit Slobodan Millosheviç për rikthimin e krenarisë kombëtare serbe. Ai ndaloi edhe te marrëdhëniet me aleatët tradicionalë, Rusinë dhe Kinën, të cilat i cilësoi si shtyllat kryesore mbështetëse për çështjen e Kosovës.

Në përmbyllje, Daçiç u mburr se ka ndihmuar më shumë se 20 shtete që të tërheqin njohjen e pavarësisë së Kosovës. Ai paralajmëroi se nëse partia e tij mbetet një faktor kyç politik në Beograd, do të vazhdojë me të njëjtën linjë agresive diplomatike për të nxitur tërheqje të tjera njohjesh.