Gjithçka nisi për një foto, ku në një artikull kushtuar shkrimtarit të njohur Ismail Kadare dhe bashkëpunimit të tij me shtëpinë botuese Onufri, u retushua fytyra e shkrimtares Flutura Açka. Ishte pikërisht Açka ajo që e vuri re këtë detaj, ku teksa shpërndau lajmin në fjalë, nuk i kurseu as kritikat.

“Të paktën “stalinistët” e mi të dashur nuk e kanë në dorë të ma retushojnë fjalën!”, shkroi Açka në ‘Facebook’, ndërsa publikoi edhe foton në versionin e saj origjinal. Por duket se ky debat ka vijuar më tej, pasi ka reaguar Bujar Hudhri, botuesi i ‘Onufrit’, një prej botuesve për gati 3 dekada të Kadaresë. Përmes një reagimi në ‘Facebook’ Hudhri ka hapur një sfidë mes ndjekësve që të gjejnë se kush është censori dhe mosmirënjohësi në këtë histori.

Sipas tij, ka qenë Açka ajo që nuk e ka përmendur asnjëherë faktin që ka punuar për 5 vite në shtëpinë botuese ‘Onufri’. Duke iu përgjigjur Açkës, për termin ‘stalinist’, Hudhri tha se; “Sa për atë që unë qenkam stalinist apo komunist, mund të shihni kontributin tim me themelimin, financimin dhe botimin prej meje për një vit të gazetës së dytë opozitare në Shqipëri “Fjala e Lirë” (14 shtator 1991-7 shtator 1992).”

REAGIMI I HUDHRIT
NJË SFIDË PUBLIKE FLUTURA AÇKËS DHE KOMENTUESVE TË SAJ TË NDERUAR!

“Flutura Açka: Pas studimeve universitare, punoi për disa vite si gazetare dhe më pas administratore dhe redaktore e botimeve në shtëpi botuese. Më 2001, bashkë me të shoqin e saj holandez, ngriti shtëpinë e saj botuese me qendër në Tiranë.”
Prej më shumë se 20 vjetësh, këto janë të dhënat biografike të Fluturës. Pra Onufri ku ajo ka punuar rreth pesë vjet, ku iu botuan tre libra, ku mësoi ç’është botimi i një libri, nuk përmendet askund. As tek librat që i ka botuar tek Toena, as te shtëpia e saj botuese. Në asnjë katalog, në asnjë shënim biografik, në asnjë intervistë në shtyp apo televizon. Deri para një muaj kur foli në televizionin e Elbasanit! Dhe nuk i kam thënë asnjë fjalë, asnjëherë, përkundrazi, e urova të zgjidhej deputete!
A është ky një censurim i Onufrit?
Por, do të bëja një thirrje publike ndërgjegjes tënde, Flutura:
A është e vërtetë që unë si gazetar i ri i gazetës “Shkumbini” në Elbasan të kam botuar ciklin e parë me poezi në vitin 1988, kur të tjerët në redaksi të bllokonin?
A është e vërtetë se unë si botues i Onufrit të kam botuar librin e parë “Tri vjeshta larg”? Po librin e dytë? Po librin e tretë? Po që të kam çuar përditë nga Elbasani në Tiranë dhe të futa në botën e letërsisë?
Shpresoj t’u japësh një përgjigje të sinqertë publikut, përderisa ke një muaj që ke hyrë në politikë dhe ndërgjegjen duhet ta kesh ende të pastër.
Ndërsa të gjithë komentuesit e nderuar në fb e Fluturës, kam rastin t’i sfidoj publikisht!
Më gjeni NJË HERË TË VETME, absolutisht, NJË HERË TË VETME kur zonja i ka përmendur këto fakte që janë të dokumentuara në katalogun e Bibliotekës Kombëtare të Shqipërisë!
Kush është censori dhe mosmirënjohësi që ka fshirë kujtesën prej 20 e ca vite? Kjo foto familjare e një shtëpie botuese private është?
Sa për atë që unë qenkam stalinist apo komunist, mund të shihni kontributin tim me themelimin, financimin dhe botimin prej meje për një vit të gazetës së dytë opozitare në Shqipëri “Fjala e Lirë” (14 shtator 1991-7 shtator 1992).
Fluturën e kam punësuar si redaktore në Prill 1992 dhe për këtë arsye nuk ka asnjë kontribut për opozitën e atëhershme sepse, ndërkohë, zgjedhjet ishin fituar nga PD (22 mars 1992).

(BalkanWeb)