TIRANË

Promovimi i vendit është një nga qëllimet për ngritjen e sektorit të turizmit këtë vit, një nga sektorët më të prekur nga pandemia e koronavirusit që i sjell vendit miliona euro.

Ministri i Turizmit dhe Mjedisit Blendi Klosi deklaroi në “Real Story” në News24 se në Golem e Durrës janë bërë investime të mëdha dhe hotelet nuk kanë ndryshim nga hotelet në Europë duke kërkuar bashkëpunim për të njohur vendin qytetarët shqiptarë dhe për t’u hapur për rajonin.

“E gjithë biseda shkon në një sektor që është ndërtuar me shumë vështirësi. Kësaj sakrifice i jemi përulur çdo moment. Në një masë të madhe hotelierët shqiptarë janë në kredi. Është marrë vendimi për shtyrjen pa penalizime për kreditë për një afat tremujor. Vendimet duhet të jenë të vështira.
Sot hoteleria e ka TVSH 6% dhe e ka marrë si askush tjetër. Dhe industria e detit po merr mbështetje, TVSH 0 për mjetet. TVSH 0 për turizmin është e pamundur të bësh një goditje kaq të madhe në arkën e shtetit ndërkohë që ke një biznes të ngritur. Duhet të bëjmë një fushatë promovuese të gjithë së bashku, t’iu kërkojmë shqiptarëve të shikojnë bukuritë në vend. Çfarë mrekullish ka bregdeti i Durrësit? Çfarë ka Prestige Resort më pak se një resort në Turqi.
Duhet të krijojmë një mundësi të artë të njohim vendin tonë, të shijojmë turizmin në Shqipëri, të hapemi për rajonin. Kjo është lufta me shëndetësinë. Nëse ne do t’ia dalim të kontrollojmë pandeminë. Të hapemi me Kosovën, të lirojmë Maqedoninë, të shikojmë Malin e Zi”, tha Klosi.

(BalkanWeb)