Forcat qeveritare të Jemenit kanë nisur sulme ndaj pozicioneve të rebelëve Huthi në distriktin Dhubab, në një zonë strategjike që mbikëqyr ngushticën Bab el-Mandeb, raporton Reuters. Operacioni vjen një ditë pasi qeveria e njohur ndërkombëtarisht e Jemenit nisi një ofensivë për rimarrjen e territoreve të kontrolluara nga rebelët Huthi.

Brigadat Gjigante, forca ushtarake pro-qeveritare, kanë njoftuar se trupat e tyre të para kanë mbërritur në zonën e Bab el-Mandeb, duke sinjalizuar zgjerimin e operacionit ushtarak në këtë rajon me rëndësi strategjike.

Ngushtica Bab el-Mandeb, e cila lidh Detin e Kuq me Gjirin e Adenit, është një nga rrugët kryesore detare të transportit ndërkombëtar dhe kontrolli i saj ka rëndësi të madhe strategjike për palët e përfshira në konfliktin e Jemenit.