Forest City, një nga projektet më ambicioze të zhvillimit urban në Malajzi, është kthyer në një simbol të një ëndrre të parealizuar. Qyteti futuristik, i ndërtuar kryesisht mbi ishuj artificialë pranë kufirit me Singaporin, u projektua për të strehuar rreth 700 mijë banorë, por sot aty jetojnë vetëm rreth 5 mijë persona.
Projekti u konceptua rreth vitit 2006 dhe u hap zyrtarisht në mars 2016. I promovuar si një qytet luksoz dhe modern, Forest City synonte të tërhiqte investitorë dhe banorë të pasur, veçanërisht nga Kina. Kompania kineze e ndërtimit Country Garden luajti një rol kryesor në zhvillimin e tij, në kuadër të projektit të lidhur me nismën “Një Brez, një Rrugë”.
Megjithatë, parashikimet optimiste nuk u realizuan. Kufizimet e vendosura nga qeveria kineze për transferimin e kapitalit jashtë vendit, pasiguritë politike në Malajzi dhe pandemia COVID-19 goditën rëndë shitjet e pronave. Si rezultat, një pjesë e madhe e apartamenteve dhe hapësirave të ndërtuara mbetën bosh.
Apartamente luksoze me çmime të ulëta
Pavarësisht boshllëkut të qytetit, Forest City ofron apartamente luksoze me çmime dukshëm më të ulëta se në qendrat e mëdha urbane të rajonit.
Sipas listimeve të cituara nga PropertyGuru, një apartament me dy dhoma gjumi, me sipërfaqe rreth 893 metra katrorë, ofrohet për rreth 420 mijë ringit malajzian, ose afërsisht 104 mijë dollarë. Ka gjithashtu prona që ofrohen për rreth 260 mijë ringit, rreth 64 mijë dollarë.
Çmimet relativisht të ulëta janë një prej faktorëve që vazhdojnë ta bëjnë zonën interesante për investitorët, edhe pse mungesa e banorëve mbetet problemi kryesor.
Përpjekja për ta ringjallur qytetin
Qeveria malajziane po përpiqet të ndryshojë fatin e Forest City. Në vitin 2024, zona u shpall zonë e veçantë financiare, me lehtësime tatimore dhe stimuj për të tërhequr banka, kompani dhe biznese.
Synimi është që krijimi i vendeve të punës dhe ardhja e kompanive të reja të sjellë gradualisht më shumë njerëz në zonë dhe të aktivizojë shërbimet lokale.
Megjithatë, sfida mbetet e madhe. Forest City ka infrastrukturë moderne, ndërtesa luksoze dhe investime kolosale, por i mungon elementi më i rëndësishëm i një qyteti: banorët.
Nga një projekt i konceptuar për qindra mijëra njerëz, Forest City është shndërruar në një prej shembujve më të pazakontë të një qyteti modern me ndërtesa të shumta, por me një popullsi shumë më të vogël nga ajo që ishte parashikuar.
