Charles Leclerc është rikthyer te fitorja në Formula 1. Piloti i Ferrarit triumfoi në Çmimin e Madh të Britanisë, të zhvilluar në pistën e Silverstone, duke regjistruar suksesin e tij të parë sezonal dhe të parin pas gati dy vitesh.

Monegasku mori kryesimin që në kthesën e parë dhe e menaxhoi garën me autoritet deri në flamurin me kuadrate. Pas tij u rendit George Russell me Mercedes, i favorizuar edhe nga një vendim i gabuar strategjik i Ferrarit, që futi Lewis Hamilton në bokse për ndërrimin e gomave vetëm pak xhiro nga fundi, gjatë periudhës së makinës së sigurisë. Britaniku humbi vendin e dytë dhe u desh të kënaqej me podiumin në shtëpi.

Makina e sigurisë hyri në pistë pas aksidentit të Max Verstappen, i cili e mbylli garën pa pikë. Në vendin e katërt përfundoi Lando Norris me McLaren.

Garë për t’u harruar edhe për Kimi Antonellin. Piloti italian i Mercedesit, që deri në momentet e fundit ishte në luftë për fitoren, u përball me probleme teknike dhe një penalitet prej pesë sekondash, duke e mbyllur garën vetëm në vendin e 16-të.

Pavarësisht rezultatit, Antonelli vijon të kryesojë renditjen e përgjithshme të kampionatit, ndonëse epërsia ndaj George Russell është ngushtuar në 25 pikë, ndërsa Lewis Hamilton dhe Charles Leclerc afrohen edhe më shumë në luftën për titull.