Media serbe Kurir i ka kushtuar një raportim të gjerë vendimit të Gjykatës Speciale në Hagë për katër ish-krerët e Ushtrisë Çlirimtare të Kosovës, duke e përcjellë procesin dhe dënimet për Hashim Thaçin, Kadri Veselin, Jakup Krasniqin dhe Rexhep Selimin.
Në raportimin e saj, Kurir i referohet UÇK-së me termin “OVK” dhe përdor një gjuhë të fortë në përshkrimin e saj, duke i cilësuar katër të akuzuarit si “ish-komandantë të OVK-së”. Media serbe shkruan se ata janë dënuar për krime lufte, ndërsa raporton edhe për konstatimet e trupit gjykues gjatë shpalljes së aktgjykimit. Sipas raportimit të Kurir, Hashim Thaçi është dënuar me 25 vite burgim, Kadri Veseli me 18 vite, Jakup Krasniqi me 25 vite, ndërsa Rexhep Selimi me 13 vite burgim.
Media serbe i ka kushtuar hapësirë edhe arsyetimit të trupit gjykues, duke raportuar se gjykata ka konstatuar përgjegjësi individuale të katër ish-krerëve për vepra të ndryshme penale të trajtuara në proces. Në artikull, Kurir veçon gjithashtu pjesë nga arsyetimi i gjykatës lidhur me rolin e secilit prej të dënuarve. Për Hashim Thaçin, media serbe raporton se trupi gjykues e ka konsideruar keqpërdorimin e pozitës si rrethanë rënduese, ndërsa për Kadri Veselin, Jakup Krasniqin dhe Rexhep Selimin përcjell konstatimet e gjykatës për rolet e tyre në strukturat e UÇK-së.
Kurir raporton edhe për reagimet në Prishtinë pas vendimit. Sipas saj, mijëra qytetarë kanë ndjekur transmetimin e drejtpërdrejtë të shpalljes së aktgjykimit dhe janë dëgjuar thirrje në mbështetje të UÇK-së, ndërsa pranë institucioneve në Prishtinë është vërejtur prani e shtuar policore.
Në një pjesë tjetër të raportimit, media serbe veçon faktin se trupi gjykues ka konstatuar se disa prej akuzave për krime lufte pas 20 qershorit 1999 nuk mund të cilësoheshin si krime lufte, pasi konflikti i armatosur ishte përfunduar në atë periudhë. Kurir raporton gjithashtu se gjykata nuk gjeti të provuar përtej dyshimit të arsyeshëm elementët e nevojshëm për disa prej akuzave për krime kundër njerëzimit. Raportimi i Kurir përfshin edhe reagimet dhe zhvillimet në Hagë, ku sipas medias serbe, mbështetës të UÇK-së u mblodhën pranë Dhomave të Specializuara dhe më pas u larguan nga zona pas kërkesës së policisë holandeze.
