Një tjetër lëvizje e rëndësishme është regjistruar ditën e sotme në Prokurorinë e Posaçme (SPAK). Shtetasja Mariela Berisha është paraqitur këtë të martë, 2 qershor 2026, përpara hetuesve të SPAK-ut, si pjesë e listës së personave të thirrur për të dëshmuar dhe dhënë llogari lidhur me procedimin penal ndaj organizatës së fuqishme kriminale të drejtuar nga Jetmir Pepa.

Ky grup kriminal, i cili u godit falë një operacioni të gjerë ndërkombëtar, dyshohet se ka trafikuar një sasi rekord prej mbi 7 tonë kokainë, duke ngritur një perandori të vërtetë financiare. Hetimet e SPAK-ut kanë zbuluar se organizata ka funksionuar në mënyrë të strukturuar gjatë viteve 2019–2021, me një rrjet të shtrirë nga vendet e Amerikës Latine e deri në portet kryesore të Europës, si në Belgjikë dhe Holandë. Në dosjen hetimore janë dokumentuar të paktën 8 episode të trafikut të sasive të mëdha të lëndës narkotike.

Tronditja më e madhe e këtij hetimi lidhet me mënyrën se si paratë e kokainës pastroheshin në Shqipëri. Prokuroria e Posaçme zbuloi se vëllezërit Pepaj kishin ngritur kompaninë e fuqishme të ndërtimit “Pepa Group”.

Përmes kësaj kompanie, ata kishin arritur të futeshin thellë në ekonominë shqiptare duke përfituar:

-Kontrata për ndërtimin e shkollave.

-Koncesione të majme për HEC-e (Hidrocentrale).

-Fonde të shumta publike nga tenderat shtetërorë.

Deri më tani, agjentët e BKH-së dhe SPAK kanë vendosur nën sekuestro preventive mbi 230 pasuri të luajtshme dhe të paluajtshme, ku përfshihen kuota aksionesh në shtatë shoqëri tregtare me seli në Tiranë, me një vlerë të llogaritur paraprakisht në rreth 12 milionë euro.

Kush janë 11 personat nën masë sigurie?

Në kuadër të këtij procedimi voluminoz, SPAK ka lëshuar 11 masa sigurie për anëtarët kryesorë të rrjetit. BalkanWeb zbardh listën e plotë të të dyshuarve të identifikuar nga prokuroria:

-Jetmir Pepaj (alias Jetmir Marashi) – Drejtues i grupit

-Aleks Pepaj (alias Shkëlqim Pepaj) – Drejtues i grupit

-Albert Pjetri

-Fatjon Marku

-Anton Marku

-Florjan Vuka

-Kristjan Lleshi

-Klevi Leka

-Lulzim Pepa

-Anton Kola

-Ilir Lazri