Kryeministri hungarez Peter Magyar ka bërë të ditur se ka nisur një hetim për marrëdhëniet e ish-ministrit të Jashtëm, Peter Szijjarto, me Rusinë, por pa dhënë detaje të mëtejshme mbi përmbajtjen e procedurës.

Gjatë një konference qeveritare të enjten, Magyar deklaroi se hetimi përfshin dokumente të klasifikuara të Ministrisë së Jashtme dhe materiale të tjera zyrtare.

“Ka dokumente të klasifikuara, ka dokumente të Ministrisë së Jashtme dhe lloje të tjera dokumentesh. Kur të ketë diçka për t’i thënë publikut, ne do ta bëjmë këtë”, u shpreh kryeministri hungarez.

Magyar theksoi se nuk dëshiron të paragjykojë çështjen dhe se informacionet e plota do të bëhen publike vetëm nëse do të ketë të dhëna konkrete nga hetimi.

Sipas gazetës “Hungarian Conservative”, hetimi vjen pas disa raportimeve mediatike të publikuara në fillim të këtij viti, të cilat pretendonin se Szijjarto kishte ndarë informacione me zyrtarë rusë gjatë kohës kur drejtonte Ministrinë e Jashtme të Hungarisë.

Ish-ministri i Jashtëm i ka mohuar më herët këto pretendime, duke i cilësuar disa prej raportimeve si “lajme të rreme”. Szijjarto ka deklaruar se komunikimi me homologë rusë, amerikanë, turq dhe izraelitë ishte pjesë e kontakteve normale diplomatike.

Njoftimi për nisjen e hetimit u bë vetëm dy ditë pasi Szijjarto deklaroi se do të largohej nga parlamenti hungarez për t’iu bashkuar kompanisë kineze të automjeteve elektrike BYD, ku pritet të mbajë një rol ekzekutiv ndërkombëtar.

Hetimi pritet të fokusohet te dokumentet zyrtare dhe materialet e klasifikuara që lidhen me periudhën e drejtimit të Ministrisë së Jashtme nga Szijjarto.